რუსეთმა ავიასაწვავის ექსპორტი აკრძალა – ინფორმაციას ამის შესახებ რუსეთის ფედერაციის მთავრობა ავრცელებს. მათივე ცნობით, აკრძალვა 2026 წლის 1 ივნისიდან 30 ნოემბრის ჩათვლით გავრცელდება.
„მიღებული გადაწყვეტილების მიზანია შიდა საწვავის ბაზარზე სტაბილური სიტუაციის უზრუნველყოფა“ – ნათქვამია განცხადებაში.
აღნიშნული აკრძალვა ეხება ბირჟაზე შეძენილ საწვავსაც. გამონაკლისს წარმოადგენს: ავიასაწვავის ის პარტიები, რომლებიც დროებითი შეზღუდვის შესახებ დადგენილების ძალაში შესვლამდე მოექცა საბაჟო პროცედურებში; სამთავრობათაშორისო შეთანხმებების ფარგლებში განხორციელებული მიწოდება; ასევე ტექნოლოგიურ რეზერვუარებში არსებული საწვავი, რომელსაც საჰაერო ხომალდები მგზავრობისას (გზაში) მოიხმარენ.
უკრაინელების მიერ რუსულ ნავთობგადამამუშავებელ ქარხნებზე თავდასხმის გამო, რუსეთში მოქმედებს ბენზინის ექსპორტის აკრძალვაც. ხოლო არამწარმოებლებს ეკრძალებათ დიზელის, გემის საწვავისა და სხვა გაზოილების ექსპორტი.