დაკავებული ლევან ახობაძის ადვოკატი, რაჟდენ კუპრაშვილი ამბობს, რომ თანხა რომელიც სუს-ის ყოფილი მაღალჩინოსნის სახლიდან ამოიღეს, მისი 2 თვის სახელფასო დანაზოგი იყო.
ამ წუთებში საქალაქო სასამართლოში გრიგოლ ლილუაშვილის ყოფილი მოადგილისთვის აღკვეთის ღონისძიების შეფარდებაზე მსჯელობენ. საქმეს მოსამართლე ნანა შამათავა იხილავს. დაცვის მხარე ითხოვს, რომ ლევან ახობაძე 20 000 ლარის სანაცვლოდ გათავისუფლდეს. პროკურატურამ კი დაკავებულის პატიმრობსი შუამდგომლობა დააყენა.
გრიგოლ ლილუაშილის ყოფილი მოადგილე, ლევან ახობაძე სუს-მა გუშინ დილით დააკავა. სუს-ის ყოფილ მაღალჩინოსანს დიდი ოდენობით ქრთამის აღების ფაქტზე ბრალი გუშინ ღამით წარედგინა.
სუს-ი ამბობს, რომ ახობაძემ 250 000 ლარის ოდენობსი ქრთამი მეწარმისგან სუს-ში საკუთარ კაბინეტში მიიღო.
ასევე აღსანიშნავია ერთი დეტალი, რომ პროკურატურის განცხადებაში სახელმწიფო უსაფრთოების სამსახურის განცხადებისგან განსხვავებით სუს-ის ყოფილი შეფის, გრიგოლ ლილუაშვილის გვარი ნახსენები არ არის. სუს-ის განცხადებით, ქრთამის შესახებ ინფორმირებული იყო ლილუაშვილიც.
დაკავებულს ბრალდება საქართველოს სისხლის სამართლის კოდექსის 338-ე მუხლის მე-3 ნაწილის „ე“ ქვეპუნქტით (მოხელის მიერ პირდაპირ ფულის მოთხოვნა და მიღება, რათა მოხელემ ქრთამის მიმცემის სასარგებლოდ განახორციელოს რაიმე ქმედება და გამოიყენოს თავისი სამსახურებრივი ავტორიტეტი ანალოგიური მიზნის მისაღწევად, ჩადენილი განსაკუთრებით დიდი ოდენობით) წარედგინა, რაც სასჯელის სახედ და ზომად 11-დან 15 წლამდე თავისუფლების აღკვეთას ითვალისწინებს.