„ღირსებით ევროპისკენ“ — ამ სლოგანის ავტორებმა მიმართულება შეცვალეს. „ქართული ოცნება“ ახალ პოლიტიკურ ნარატივს ტესტავს. ივანიშვილის გუნდის გზავნილებში აღარც ღირსება ფიგურირებს და ევროპასაც, ფაქტობრივად, მხოლოდ კრიტიკულ კონტექსტში ახსენებენ. ბოლო სამ დღეში ჯერ ირაკლი კობახიძემ, ახლა კი შალვა პაპუაშვილმა პირდაპირ განაცხადეს, რომ არსებული ფორმატის ევროკავშირი მათთვის მიუღებელია და იქ საქართველოს არაფერი ესაქმება.
პაპუაშვილი ამ განცხადებით იმ წერილს გამოეხმაურა, რომელიც ოპოზიციურმა ალიანსმა ევროკავშირიდან მიიღო. ბიძინა ივანიშვილის პარტიაში განსაკუთრებულ გაღიზიანებას იწვევს ის ფაქტი, რომ ევროპული გაერთიანება ქართველ ხალხს და „ქართულ ოცნებას“ ერთმანეთისგან მკაფიოდ მიჯნავს. ბრიუსელიდან გამოგზავნილ დოკუმენტში ხაზგასმით წერია, რომ ივანიშვილის გუნდის თავდასხმების მიუხედავად, ევროკავშირი არ აპირებს უარი თქვას ქართველი ხალხის თანადგომაზე.
ეს ოფიციალური პოზიცია პასუხია იმ მიმართვაზე, რომელიც ბრიუსელში ოპოზიციურმა გაერთიანებამ გააგზავნა. ოპოზიცია პარტნიორებისგან ითხოვს, რომ „ქართული ოცნების“ ანტიდასავლური კურსის გამო ევროკავშირმა საქართველო არ გაწიროს, მოქალაქეებს უვიზო მიმოსვლა არ შეუჩეროს და ევროპაში შეცვლილი ძალთა ბალანსი ივანიშვილის გუნდზე პოლიტიკური წნეხის გასაძლიერებლად გამოიყენოს.