ზაზა შათირიშვილი აცხადებს, რომ დონალდ ტრამპის მიერ „დიფ სთეითის“ წინააღმდეგ გამოცხადებული ომი სრული ფარსი აღმოჩნდა და მეტიც, თავად დონალდ ტრამპიც „დიფ სთეითის“ მიერ იმართება.
“საჭიროა გულწრფელად საუბარი იმაზე, რომ დღეს კრიზისი მხოლოდ ევროპული ბიუროკრატიის პრობლემა აღარ არის, ეს უფრო ფართო პოლიტიკური და ღირებულებითი პროცესია, რომელთან დაკავშირებით დუმილიც ისეთივე მნიშვნელოვანი პოლიტიკური გზავნილია, როგორც ხმამაღალი განცხადებები.
ფაქტია, რომ დონალდ ტრამპის მიერ ვითომდა „დიფ სთეითის“ წინააღმდეგ გამოცხადებული ომი სრული ფარსი აღმოჩნდა, მეტიც, უკვე ყველასთვის ცხადია, რომ დონალდ ტრამპიც „დიფ სთეითის“ მიერ იმართება. ეს მხოლოდ მოსაზრება კი არა, უკვე დადასტურებული ფაქტია. წინააღმდეგ შემთხვევაში, როგორ აიხსნება ის, რომ დონალდ ტრამპს:
არცერთი ოლიგარქიული ოჯახი და მათი კომპანია არ უმხილებია?!
არცერთი ისეთი ნაბიჯი არ გადაუდგამს, რომელიც „დიფ სთეითის“ გეგმებსა და პოლიტიკასთან მოდიოდა წინააღმდეგობაში?!
ბოლომდე არ მიუყვანია ფსევდოლიბერალური დღის წესრიგისა და „ლგბტქ+“ პროპაგანდის წინააღმდეგ ბრძოლა?!
არათუ ის სამხედრო კონფლიქტები არ დაუსრულებია, რომელთა დასრულების პირობასაც დებდა, არამედ გლობალური ომის პარტიის ინტერესების შესაბამისად, თავად იქცა ომის გამჩაღებლად?!
რა თქმა უნდა, ამ რიტორიკული კითხვების დასმა მრავლად შეიძლება, მაგრამ აშკარაა, რომ ტრამპი არ და ვერ წავა იმ ოლიგარქიული ოჯახების ინტერესების წინააღმდეგ, რომელთაც თავადაც ემორჩილება, მისი მოჩვენებითი აქტიურობა კი, მხოლოდ და მხოლოდ, დიდი თამაშის პატარა ნაწილია” – წერს ზაზა შათირიშვილი წერილში.