სასახლის ღობის საქმეზე ბრალდებულებს შესაძლოა საპროცესო შეთანხმება გაუფორმდეთ. ამის შესახებ სხდომის დასრულების შემდეგ საქმის პროკურორმა, როინ ხინთიბიძემ ჟურნალისტებთან განაცხადა.
მისი თქმით, კვლავ მიმდინარეობს მოლაპარაკებები იმ ბრალდებულებთან, რომლებმაც პროკურატურას საპროცესო შეთანხმების თხოვნით მიმართეს. როინ ხინთიბიძემ აღნიშნა, რომ შეთანხმების მიღწევა შესაძლებელია, სანამ მოსამართლე სათათბიროდ გავა.
ამასთან, მისივე თქმით, პროკურატურას საპროცესო შეთანხმების თხოვნით კიდევ რამდენიმე ბრალდებულმა მიმართა.
“დღეს ჩატარდა ჯგუფურ ძალადობაში მონაწილე 13 პირის ბრალდების სასამართლო განხილვა. მოვისმინეთ 15 ადვოკატის დასკვნითი სიტყვა, ასევე მოვისმინეთ რეპლიკები და საქმე გადაიდო საბოლოო სიტყვების ეტაპზე, სადაც ასევე სასამართლო გამოაცხადებს, მაღალი ალბათობით, განაჩენსაც.
ყველა მათგანმა, ვისთანაც მიმდინარეობს მოლაპარაკება საპროცესო შეთანხმების გაფორმების თაობაზე, მოგვმართა განცხადებით, სადაც აღნიშნეს, რომ აღიარებენ დანაშაულს, ჩვენ შორის არ დასრულებულა მოლაპარაკების პროცესი, კვლავ მიმდინარეობს. მხარეებს შეუძლიათ მოსამართლის სათათბირო ოთახში გასვლამდე მიაღწიონ შეთანხმებას. მოსამართლე სათათბირო ოთახში გასული არ არის.
ერთადერთ პიროვნებას აქვს აღიარებული, მოცემულ პროცესზე, უშუალოდ პროცესის განმავლობაში დანაშაული აღიარებული, რომელმაც უდავოდ მიიჩნია მტკიცებულებები და მანაც თავისი ნებით, ადვოკატის მონაწილეობით აღიარა დანაშაული.
დღესაც მოგვმართეს განცხადებით და პერიოდულად არაერთი მათგანი მოგვმართავს განცხადებით, რომ გავუფორმოთ საპროცესო შეთანხმება, რაც რა თქმა უნდა მოლაპარაკების საგანია, ჩვენ შორის გაგრძელდება მოლაპარაკება, თუ რაიმეზე მივაღწევთ შეთანხმებას, აუცილებლად გავაფორმებთ საპროცესო შეთანხმებას,” – ამბობს პროკურორი როინ ხინთიბიძე.