ოპოზიციონერი პოლიტიკოსი რომან გოცირიძე ოჯახის სიწმინდის დღესთან დაკავშირებით, სოციალურ ქსელში მიმართვას ავრცელებს.
“ეკლესიას, რომელსაც ლექსო ლაშქარავას სიკვდილშიც მიუძღვის ბრალი მისი ფანატიკოსი მღვდლების მონაწილეობით, ხალხის მოწონების რეიტინგი 90 პროცენტი ჰქონდა და არც მერე შეცვლილა ბევრად. მრავალი ცუდი რამ, რაც არ მოგვწონს ეკლესიაში, ხალხის (გინდ მრევლი უწოდე და გინდ ამომრჩეველი) მხარდაჭერითა თუ წაყრუებით ხდება.
17 მაისს მსოფლიოს ცივილიზებული ნაწილი აღნიშნავს როგორც ჰომოფობიის წინააღმდეგ ბრძოლის დღეს. ეკლესიის მიერ ამ თარიღის გადასაფარად ე.წ. ოჯახის სიწმინდის დღის დაწესება არის არაჰუმანური და ჰომოფობიის წახალისების აქტი. ამ “ზეიმის” ჩატარებას ყოველმხრივ უწყობს ხელს “ოცნების” მოძალადე რეჟიმი, რომელსაც იგი ანტიდასავლური განწყობილებების გასაღვივებლად იყენებს.
ამ აქციაში მონაწილეობა, რომელიც ტრადიციული მარშით მთავრდება, სულ მცირე, არის უხერხული. სამწუხაროდ, ბევრმა, ვინც ქუჩაში გამოდის, არ იცის ამ “ზეიმის” ძალადობრივი კონტექსტის შესახებ.” – წერს რომან გოცირიძე.