რადიო თავისუფლების ინფორმაციით, აშშ-მა ათობით ქვეყნის მოქალაქეები გაათავისუფლა $5 000-დან $15 000-მდე სავიზო დეპოზიტის მოთხოვნისგან იმ შემთხვევაში, თუ მათ აშშ-ში 2026 წლის ფეხბურთის მსოფლიო ჩემპიონატზე დასასწრები ბილეთები ექნებათ.
რადიო თავისუფლებას აშშ-ის საელჩოში უთხრეს, რომ საქართველო ამ ქვეყნებში არ არის
„არა, სავიზო დეპოზიტის/გარანტიის ვალდებულების მოხსნა არ ვრცელდება საქართველოს მოქალაქე განმცხადებლებზე“, — აშშ-ის საელჩო
შეგახსენებთ, რომ 2026 წლის 2 აპრილიდან, საქართველოს მოქალაქეებისთვის ამერიკის შეერთებული შტატების ვიზების გაცემის წესი შეიცვალა. აშშ-ის სახელმწიფო დეპარტამენტმა საქართველო იმ 50 ქვეყნის სიაში შეიყვანა, რომლებზეც „სავიზო საგარანტიო საპილოტე პროგრამა“ გავრცელდა.
ცვლილებების შედეგად, საქართველოს მოქალაქეები ტურისტულ და ბიზნეს (B1/B2) ვიზებს ვეღარ მიიღებენ 10-წლიანი ვადით. ამიერიდან ვიზა გაიცემა მხოლოდ ერთჯერადად, 3 თვის ვალიდობით და ქვეყანაში მაქსიმუმ 30 დღით დარჩენის უფლებით.
ახალი რეგულაციით, აპლიკანტებს ვიზის მისაღებად შესაძლოა დასჭირდეთ ფინანსური გარანტიის, ე.წ. ბონდის წარდგენა. თანხის ოდენობას 5 000, 10 000 ან 15 000 აშშ დოლარს საკონსულო ოფიცერი ინტერვიუს დროს განსაზღვრავს