თბილისის საქალაქო სასამართლოში საერთაშორისო საკითხების ექსპერტის, ალექსი (ბუკა) პეტრიაშვილის სასამართლო პროცესი მიმდინარეობს.
მას ადმინისტრაციული პატიმრობა 17 დეკემბერს ტროტუარზე დგომის გამო ემუქრება.
ბუკა პეტრიაშვილმა პროცესზე მოსამართლეს მიმართა და განაცხადა, რომ კანონი, რომლითაც მას და სხვა სამოქალაქო აქტივისტებს ასამართლებენ, სრულიად ანომალიურია და კონსტიტუციას ეწინააღმდეგება. ინფორმაციას “ტვ პირველი” ავრცელებს.
“ეს კანონი არის სრულიად ანომალიური, სრულიად ეწინააღმდეგება კონსტიტუციას. სწორედ ამგვარი კანონებით და უკანონოდ ადამიანების დაპატიმრებითაა გამოწვეული ის პროტესტი, რომელიც საზოგადოებაში არსებობს. ჩვენ გვაქვს ამის უფლება. სულ რომ ადამიანი იდგეს თავისუფალ სივრცეზე რუსთაველზე, შსს მიიღებს ინსტრუქციას, რო შესავსებია ადგილები… ამ პროტესტში 100-დან 100%-ს ადამიანების, აქვს მშვიდობიანი გამოხატვის ფორმა პროტესტის,” – მიმართა მოსამართლეს ბუკა პეტრიაშვილმა.
პროცესის დაწყებამდე ბუკა პეტრიაშვილმა განმარტა, რომ იმის შესაბამისი მოლოდინი აქვს, როგორი კონვეერული წესითაც ხდება უდანაშაულო ადამიანების საპატიმროში გაშვება.
“მორიგი აბსურდის თეატრია, სამწუხაროდ, გვიწევს ამაში მონაწილეობის მიღება. რეალურად, 17 დეკემბერს ტროტუარზე დგომის უფლებას მედავებიან და რეალურად, არავითარ ხელშეშლას და არავითარ არაკანონიერ ქმედებას ადგილი არ ჰქონია, თუმცა მოლოდინი, გამომდინარე იქიდან, როგორი კონვეერული წესითაც ხდება საპატიმროში გაშვება ახალგაზრდების, სტუდენტების, სრულიად უდანაშაულო ადამიანების, შესაბამისად მოლოდინიც მაგის შესაბამისი მაქვს,” – განაცხადა ბუკა პეტრიაშვილმა პროცესის დაწყებამდე.