გიორგი გახარიას გუნდი “ქართული ოცნების” დეპუტატს, თენგიზ შარმანაშვილს წლების წინ, მის კაბინეტში დაკიდებულ მიხეილ სააკაშვილის ფოტოს ახსენებს – საქმე ეხება იმ პერიოდს, როცა წინა ხელისუფლების დროს შარმანაშვილი ელჩად იყო დასაქმებული.
დღეს “ტვ პირველმა” თენგიზ შარმანაშვილს ფოტოს ისტორიის შესახებ ჰკითხა – “ქართული ოცნების” წევრი განმარტავს, რომ მაშინდელი პროტოკოლით, საგარეოს საქმეთა სამინისტროს გადაწყვეტილებით, ყველა კაბინეტში იყო მიხეილ სააკაშვილის ფოტო და მისი ჩამოხსნის უფლება არავის ჰქონდა.
მე ვიყავი არაპოლიტიკური თანამდებობის პირი, 900 ჯერ განვმარტე და ბევრი გაუნათლებელი ამას ვერ ხვდება – უთხრა შარმანაშვილმა “ტვ პირველს”
“აბსოლუტური სისულელეა. მაგ პარტიის წევრი არასდროს არ ვყოფილვარ. ერთი კადრი მაინც თუ აქვთ, რომ ან მაგათ ყრილობაზე რომ ვარ… ეგ (სურათი) მე რომ დავინიშნე ელჩად, დამხვდა იქ. მაშინდელი კაბინეტი როგორ უნდა ყოფილიყო მოწყობილი, დამტკიცებული იყო საგარეო საქმეთა სამინისტროს მიერ. შევედი და დავჯექი, მე კი არ დამიკიდებია ის. ჩამოხსნა რა თქმა უნდა არ შემეძლო, იმიტომ, რომ რა უნდა იყოს ატრიბუტიკა, ამას საგარეო საქმეთა სამინისტრო წყვეტდა და ეს იყო სტანდარტი. მე ვიყავი არაპოლიტიკური თანამდებობის პირი, 900 ჯერ განვმარტე და ბევრი გაუნათლებელი ამას ვერ ხვდება და რა ვუყო ახლა”, – ამბობს შარმანაშვილი.
ფოტო, სადაც შარმანაშვილის კაბინეტში მიხეილ სააკაშვილის ფოტო კიდია, სოციალურ ქსელში ვრცელდება.