ლევან ხაბეიშვილის, გურამ როგავასა და ზვიად მაისაშვილის ცემის საქმეზე დაკავებული სპეცრაზმელებისა და ძალოვნების საქმე გრიფით „საიდუმლო“ დაედო. ბრალდებულებს სასამართლოშიც დახურული სხდომების ფარგლებში გაასამართლებენ. რა მასალებს შეიცავს საქმე და რის გასაჯაროებას ერიდება გამოძიება, უცნობია. ადვოკატების თქმით, დაცვის მხარეს საქმის მასალები ამ დრომდე სრულად არ გადასცემია.
„პირველების“ ინფორმაციით, პროკურატურაში დაკითხვების სერია დაახლოებით ერთი თვის წინ დაიწყო. ეს პერიოდი ემთხვევა ეუთოს სპეციალური მექანიზმის დასკვნის გამოქვეყნებასაც, სადაც აღნიშნული იყო, რომ საქართველოში წამებისა და ძალადობის საქმეების გამოუძიებლობის შემთხვევაში, ეუთოს წევრ სახელმწიფოებს ჰააგის ტრიბუნალისთვის მიმართვის შესაძლებლობა ექნებოდათ.
წყაროს ცნობით, დაკავებულებს შორის არის დაცვის პოლიციის თანამშრომელიც, რომელიც საპროტესტო აქციების დაშლის დროს ე.წ. „ხარებას რაზმში“ ირიცხებოდა. არსებული ინფორმაციით, ერთ-ერთი სპეცრაზმელი აღიარებს, რომ სწორედ ის ფიგურირებს კადრებში, სადაც ზვიად მაისაშვილზე ძალადობა ჩანს.
„პირველების“ ინფორმაციითვე, სპეცრაზმის ერთ-ერთი ხელმძღვანელი გიორგი ბოლათაშვილი დაახლოებით ერთი თვის წინ სხვა საქმეზეც დააკავეს. მას ქვემო ქართლის ყოფილი ვიცე-გუბერნატორის, გიორგი შინჯიკაშვილის გარემოცვაზე თავდასხმას ედავებიან. წყაროს ცნობით, ბოლათაშვილმა ეს დაპირისპირება მას შემდეგ დაიწყო, რაც თავად გახდა ფიზიკური ანგარიშსწორების მსხვერპლი. უკვე პატიმრობაში მყოფ ბოლათაშვილს მოგვიანებით ახალი ბრალდება — აქციების დროს მოქალაქეებზე ძალადობა — წაუყენეს.
გავრცელებული ინფორმაციით, გიორგი ბოლათაშვილი ე.წ. „ხარებას რაზმის“ ერთ-ერთ ახლო ფიგურად ითვლებოდა.