მამუკა მდინარაძე „კამიტის საქმეზე“ კომენტარს აკეთებს – როგორც ახლად დანიშნული სახელმწიფო მინისტრი ირწმუნება, ის და სუს-ის გამომძიებლები გაერკვნენ დეტალებში და დადგინეს, რომ BBC-ის საგამოძიებო რეპორტაჟი “მაღალი აბსურდულობის ხარისხის იყო”.
მე გამიჭირდება სერიოზულად მსჯელობა „კამიტის საქმეზე“ – თქვა დღეს მამუკა მდინარაძემ.
მან ასევე ისაუბრა „ტრიქლორეთილენზე”- ნეიროტოქსიკურ ნივთიერებაზე, რომელსაც ადამიანის ჯანმრთელობაზე გამოუსწორებელი ზიანის მიყენება შეუძლია – “ამბობდნენ, რომ წყალში გამხსნელი „ტრიქლორეთილენი“ თითქოს იყო გამოყენებული მომიტინგეების წინააღმდეგ, როცა თავად ეს გამხსნელი წყალში არ იხსნებოდა”.
„კამიტზე“ თავადაც მივიდნენ იმ დასკვნამდე, რომ არ შეიძლებოდა სერიოზულად საუბარი. „კამიტის“ შემდგომ ამბობდნენ, რომ არა „კამიტი“, მაგრამ „ტრიქლორეთილენი“ იყო ის ნივთიერება, რომელიც ასევე მათი თქმით, იყო აკრძალული ცალკეულ ქვეყნებში და ეს იქნა გამოყენებული. წავაწყდით ასეთ პარადოქსულ ამბავს, რომ არც ერთს მათ შორის, არც ჟურნალისტს, არც NGO-ს წარმომადგენელს, არც BBC-ის და ა.შ. ვინც ამაზე აპელირებდა, როგორც აღმოჩნდა, „დაგუგლული“ და „დასერჩილიც“ კი არ ჰქონდა ამის შესახებ, რადგან ბოლოს აღმოჩნდა, რომ „ტრიქლორეთილენი“ უბრალოდ წყლაშიც კი არ ერევა. მისი სიმკვრივე, ელემენტარული ქიმია თუ ვინმემ იცის, აღმოჩნდა უფრო მეტი, უფრო მკვრივი აღმოჩნდა ეს ნივთიერება და წყალში გახსნის შედეგად ჩადის ქვემოთ და უბრალოდ, წყალშიც არ ერევა. ამის ფონზე ამბობდნენ ასეთ ფრაზებს და წინადადებებს, რომ წყალში გამხსნელი „ტრიქლორეთილენი“ თითქოს იყო გამოყენებული მომიტინგეების წინააღმდეგ, როცა თავად ეს გამხსნელი წყალში არ იხსნებოდა. ასეთი პარადოქსული ნიუანსები აღმოჩნდა იქ გამოძიების დროს და ჩვენ, მაშინ უმოკლეს ვადაში დავადგინეთ, რომ ამაზე სერიოზული მსჯელობა უბრალოდ წარმოუდგენელი იყო. ეს დავასკვენით იმ კონკრეტულ შემთხვევაში მტკიცებულებებზე დაყრდნობით და ამიტომ იყო ქართული სახელმწიფოს თამამი განცხადება იმის შესახებ, რომ ამ დაბრალებას გავასაჩივრებდით ყველა საერთაშორისო დონეზე და დარწმუნებული ვართ, დეტალებისა და მტკიცებულებების სიზუსტით, რომ ჩვენ საერთაშორისო სამართლებრივ ასპარეზზე მივაღწევთ უდავო წარმატებას“, – განაცხადა მამუკა მდინარაძემ.
შეგახსენებთ, რომ BBC-ის გამოძიების მიხედვით, საქართველოს ხელისუფლებამ გასულ წელს აქციების დასაშლელად წყლის ჭავლებში პირველი მსოფლიო ომის დროინდელი ქიმიური ნივთიერება – „კამიტე“ გამოიყენეს.