ირაკლი კობახიძემ მთავრობის სხდომის დაწყებამდე, მინისტრთა კაბინეტის ორ ახალ მინისტრს, მამუკა მდინარაძესა და სულხან თამაზაშვილს თანამდებობების დაკავება კიდევ ერთხელ მიულოცა.
მან მინისტრებს საქმიანობაში წარმატება უსურვა.
„მამუკა მდინარაძეს მივულოცავ თანამდებობის დაკავებას. ის პირველად ესწრება საქართველოს მთავრობის სხდომას. კიდევ ერთხელ მინდა გავუსვა ხაზი, რა თქმა უნდა, სამართალდამცავი ორგანოების კოორდინაციის მნიშვნელობას. ბუნებრივია, სახელმწიფოსთვის განსაკუთრებით მნიშვნელოვანია ამ სტრუქტურების გამართული მუშაობა, მათი საერთო კოორდინაციის ეფექტიანად უზრუნველყოფა. ამ ყველაფერში, რა თქმა უნდა, სახელმწიფო მინისტრის თანამდებობა და ვიცე – პრემიერის თანამდებობა, პიროვნულად მამუკა მდინარაძე განსაკუთრებულ როლს შეასრულებს. მას მინდა განსაკუთრებული წარმატება ვუსურვო. ასევე, მინდა აღვნიშნო, რომ მამუკა მდინარაძე დაუბრუნდება აქტიურ პოლიტიკურ ცხოვრებას, რაც მნიშვნელოვანია მთავრობისთვის, ჩვენი პოლიტიკური გუნდისთვის. კიდევ ერთხელ წარმატებას ვუსურვებ მამუკა მდინარაძეს.
ასევე, პირველად ესწრება საქართველოს მთავრობის სხდომას შინაგან საქმეთა მინისტრი სულხან თამაზაშვილი. მასაც მინდა წარმატება ვუსურვო. მინდა აღვნიშნო მისი წარმატებული საქმიანობა აჭარის ავტონომიური რესპუბლიკის მთავრობის თავმჯდომარის თანამდებობაზე, სადაც ერთი წლის განმავლობაში მნიშვნელოვანი ცვლილებები განხორციელდა. მას წარმატებას ვუსურვებ ახლა უკვე შსს-ის ხელმძღვანელის პოზიციაზე.
ასევე, კიდევ ერთხელ მივულოცავ ზურაბ პატარაძეს აჭარის ავტონომიური რესპუბლიკის მთავრობის თავმჯდომარის თანამდებობის დაკავებას და გეკა გელაძეს, ჩვენს კოლეგას ვულოცავ სუს-ის ხელმძღვანელის თანამდებობის დაკავებას. გისურვებთ წარმატებას თქვენს საქმიანობაში“, – განაცხადა კობახიძემ.