საქართველო ევროკავშირის გაფართოების მინისტერიალზე არ მიიწვიეს – ინფორმაციას “ფორმულა” ავრცელებს. როგორც მათ კვიპროსის თავმჯდომარეობის პრესსამსახურიდან აცნობეს, საუბარია ნიქოზიაში 10-11 მაისს დაგეგმილ ევროპულ საქმეთა მინისტრების არაფორმალურ შეხვედრაზე.
„საქართველოს მთავრობის მოქმედების კურსის გათვალისწინებით, რომელიც ეწინააღმდეგება ევროკავშირის ფუძემდებლურ ღირებულებებსა და პრინციპებს, საქართველოს გაწევრიანების პროცესი 2024 წელს დე ფაქტო შეჩერდა. შესაბამისად, წინა თავმჯდომარეობების პრაქტიკის შესაბამისად, საქართველო არ ყოფილა მიწვეული. ამავდროულად, გვსურს შეგახსენოთ, რომ ევროკავშირმა მკაფიოდ ხაზგასმით აღნიშნა კავშირის მზადყოფნა, მხარი დაუჭიროს ქართველი ხალხის ევროპულ მისწრაფებებსა და ქვეყნის გზას გაწევრიანებისკენ, იმ შემთხვევაში, თუ საქართველოს ხელისუფლება შეცვლის თავის ამჟამინდელ კურსს“ – მისწერეს “ფორმულას” კვიპროსის თავმჯდომარეობის პრესსამსახურიდან.