“ლელო ძლიერი საქართველოს“ ერთ-ერთი ლიდერი, გრიგოლ გეგელია ირაკლი კობახიძის ერევანში შეხვედრებზე დასწრებას ბუტაფორულს უწოდებს და ამბობს, რომ “მას არავინ ელის და მასთან სასაუბრო არავის აქვს“.
მისი თქმით, „ხელისუფლებამ ყველაფერი გააკეთა ამ გასული 2 წლის განმავლობაში, რომ საქართველო იზოლაციურ ჭაობად ქცეულიყო.“
მისივე თქმით, “ქართული ოცნება“ ყველაფერს აკეთებს იმისთვის, რომ ქვეყნის ეროვნული ინტერესები ფეხქვეშ იყოს გათელილი.
“ჩვენ ვხედავთ ბუტაფორიულ დასწრებას ისეთ შეხვედრაზე, რომელიც, პირველ რიგში თბილისში უნდა იმართებოდეს და არა სადღაც, სხვაგან. ჩვენ ვნახეთ, რომ ეს შეხვედრა იმართება ერევანში, მანამდე გაიმართა მოლდოვაში, მაგრამ არცერთი პოლიტიკური ვიზიტით, არცერთი სოლიდური ლიდერი არ ჩამოსულა წლების განმავლობაში საქართველოში. ნაცვლად იმისა, რომ აქ ხდებოდეს რაღაცები, დღეს, თბილისი იყოს ჩვენი რეგიონალური დინამიკის ცენტრი, ვხედავთ, ცენტრი არის გადასული სხვაგან და კობახიძე, როგორც ბუტაფორია, ესწრება შეხვედრას, სადაც მას არავინ ელის და სადაც მასთან სასაუბრო არავის აქვს იმ მარტივი მიზეზით, რომ ამ ხელისუფლებამ ყველაფერი გააკეთა ამ გასული 2 წლის განმავლობაში, რომ საქართველო ქცეულიყო იზოლაციურ ჭაობად, რომელსაც აღარ გააჩნია მეგობრები და პარტნიორები, რომელიც მტრებს ეძახის მოყვარეს, მოყვარეს მტერს და ყველაფერს აკეთებს იმისთვის, რომ ჩვენი ქვეყნის ეროვნული ინტერესები იქნეს ფეხქვეშ გათელილი” – განაცხადა გეგელიამ.
სომხეთში ევროპული პოლიტიკური გაერთიანების (EPC) მე-8 სამიტი იმართება. სომხეთში იმყოფებიან ევროპელი ლიდერები. ერევანშია ირაკლი კობახიძეც.