როგორ ხედავს სალომე ზურაბიშვილი “ქართული ოცნების” დამარცხების გზებს – საქართველოს მეხუთე პრეზიდენტმა, გუშინ Facebook Live-ს დროს თქვა, რომ ივანიშვილის გუნდის დამარცხება თავისუფალ არჩევნებზე გადის. ზურაბიშვილი ამბობს, რომ თავისუფალი და დემოკრატიული არჩევნების მოსაპოვებლად ოპოზიციისა და საზოგადოების კონსოლიდაციაა საჭირო.
გაერთიანება უნდა ეხებოდეს არა მარტო პარტიებს, არამედ საზოგადოების ყველა სეგმენტს – ამბობს საქართველოს მეხუთე პრეზიდენტი.
“მე ჯერ ერთი არ ვსაუბრობ პარტიების გაერთიანებაზე, პარტიები იმისი არის, რომ ყველას ჰქონდეს თავისი იდენტობა და თავისი განსხვავებული ხედვა, რომელიც აისახება შემდეგ არჩევნებზე – როცა იქნება სამართლიანი და თავისუფალი არჩევნები.
პირველი, მანამ სანამ აქამდე მივალთ, იქნება უთუოდ საბრძოლველი არჩევნები, რომელიც მოითხოვს სხვა ტემპის გაერთიანებას, მოითხოვს საზოგადოების ყველა ძალების გაერთიანებას ამ ერთპარტიული, ავტორიტარული, რუსული რეჟიმის წინააღმდეგ. ეს არის ნამდვილი გაერთიანება და აქ უნდა გავიმარჯვოთ და შემდეგ გაიხსნება ველი ყველა სხვადასხვა პარტიებისთვის და საზოგადოება თვითონ აირჩევს, რომელი მსოფლმხევდელობა, რომელი პროგრამაა მისთვის მისაღები ამ ქვეყნის მომავლისთვის.
გაერთიანება უნდა ეხებოდეს ყველა სეგმენტს – პარტიებს თავისთავად, მაგრამ არა მხოლოდ პარტიებს. ეს დიდი გაერთიანება, რომელსაც სხვათაშორის ძალიან უწყობს ხელს “ოცნება” , იმიტომ, რომ მათი ყველა გადაწყვეტილება რეალურად მიმართულია იმისკენ, რომ საზოგადოების რომელიმე ერთი სეგმენტი გადაიმტეროს, უკმაყოფილოდ აქციოს და ამ მხრივ ეს გაერთიანება საბრძოლველად თავისთავად მზადდება. იმდენი საკითხი არის, რომელიც ხალხში იწვევს ძალიან დიდ შფოთვას”, – განაცხადა სალომე ზურაბიშვილმა.