მაშინ, როდესაც საქართველოში პენსიონერს აქვს 300 ლარი, ევროპაში პენსიონერს აქვს 5 000 ლარზე მეტი, რომ გადავიყვანოთ ევრო ლარში. მინიმალური ხელფასის ზღვარი ევროპაში არის 5 000 ლარზე მეტით დადგენილი, საქართველოში კი 20 ლარით – „იმედის“ სიუჟეტი იყო მოქალაქეების დაცინვა, – ამის შესახებ „გახარია საქართველოსთვის“ დეპუტატმა, ვიკა ფილფანმა ჟურნალისტებთან განაცხადა.
მისივე თქმით, სიუჟეტში ძალიან ნათლად ჩანდა, რა დამოკიდებულება აქვს „ქართულ ოცნებას“ ამ ქვეყნის მოქალაქეების მიმართ.
„ბატონი კობახიძე ფასების კლებას მოქალაქეებს ჯერ კიდევ დეკემბერში დაჰპირდა. დეკემბრიდან რამდენიმე თვე გავიდა და ფასებმა მოიმატა. „ქართული ოცნების“ პირობებში, ვერაფრის ფასი ვერ შემცირდება, იმიტომ რომ არის კორუფცია. კორუფციის საფასურია ყველა თეთრი, რომელიც ემატება საქართველოში პირველადი მოხმარების პროდუქტს და რომელსაც იხდიან საქართველოს მოქალაქეები. თუ გვინდა, რომ ადამიანების ცხოვრება გაუმჯობესდეს, უბრალოდ, ცოტა ხნით უნდა აღიარონ, რომ ფასებს ვერაფერს აკლებენ და გაზარდონ ხელფასები, დააწესონ მინიმალური ხელფასის ზღვარი და მოუმატონ პენსიები ადამიანებს 200 ლარით. გუშინ, „იმედმა“ რა სიუჟეტიც გააკეთა ალბათ, ყველამ ნახეთ. ეს იყო უბრალოდ, ადამიანების დაცინვა საქართველოში, მაშინ როცა პროდუქტის ფასები შეადარა გერმანიას, საფრანგეთს და ევროპის სხვა ქვეყნებს.
ასეთი დამოკიდებულება საკუთარი ამომრჩევლის მიმართ და საქართველოს მოქალაქეების მიმართ არის უბრალოდ, დამამცირებელი. მათ არ შეადარეს ხელფასები და პენსიები, რაც ყველაზე მნიშვნელოვანია. მაშინ, როდესაც საქართველოში პენსიონერს აქვს 300 ლარი, გერმანიასა და ევროპაში პენსიონერს აქვს 5000 ლარზე მეტი პენსია, რომ გადავიყვანოთ ევრო ლარში. მინიმალური ხელფასის ზღვარი ევროპაში არის 5000 ლარზე მეტით დადგენილი, საქართველოში კი მინიმალური ხელფასის ზღვარი 20 ლარით არის დადგენილი. ამ სიუჟეტში ძალიან ნათლად ჩანდა, რა დამოკიდებულება აქვს „ქართულ ოცნებას” ამ ქვეყნის მოქალაქეების მიმართ,” – განაცხადა ფილფანმა.