მარტში ძროხის ხორცი წლიურად 17%-ით, ღორის კი 9.4%-ით გაძვირდა – ამის შესახებ ინფორმაციას bm.ge ავრცელებს და წერს, რომ ოფიციალური სტატისტიკით, საქართველოში ხორცის ფასი მზარდია. ხორცი და ხორცის პროდუქტების ჯგუფში მარტში ფასის 9.6%-იანი ზრდა დაფიქსირდა.
ძროხის ხორცის ფასი იანვრიდან მოყოლებული 10%-ზე მეტად იზრდება. უფრო დეტალურად, ძროხის ხორცი 2026 წლის იანვარში წლიურად 13.5%-ით გაძვირდა, თებერვალში მატება 15.3% იყო, ხოლო მარტში 16.7%. ძროხის ხორცის ფასი გაიზარდა თვის ჭრილშიც და მარტში, თებერვალთან შედარებით, 1.4%-იანი მატება იყო.
ღორის ხორცის ფასი 11%-ით გაიზარდა იანვარში, ფასის წლიური ზრდა 10.1% იყო თებერვალში, მარტში კი 9.4%. მარტში, თებერვალთან შედარებით, ფასი 0.8%-ით შემცირდა.
გაიზარდა ქათმის ხორცის ფასიც – წლიური მატება იანვარში 10.6% იყო, თებერვალში 9.4%, მარტში 6.6%. მატებაა თვის ჭრილშიც და მარტში, წინა თვესთან შედარებით, ზრდა 2% იყო.
ამასთან, მარტში წლიურად 14.5%-ით გაიზარდა ძროხის ხორცის ფარშის ღირებულება და 6%-ით გაძვირდა შებოლილი ხორცი.
რაც შეეხება კვერცხს, იანვარში ფასმა 10.1%-ით მოიმატა, ფასის წლიური ზრდა დაბალი იყო თებერვალსა (3.5%) და მარტში (2.1%), იმ ფონზე, რომ 6 თებერვალს მეფრინველეობის განვითარების ასოციაციამ („სავანეთი“, „დილა“, „კოდა“, „კუმისი“) მიიღო გადაწყვეტილება კვერცხის 5%-იანი გაიაფების შესახებ.