“ყველამ ვიცით, რომ მამუკა მდინარაძეს აქვს ძალიან დიდი პოლიტიკური და მენეჯერული გამოცდილება” – რიმა ბერაძე

რიმა ბერაძე აცხადებს, რომ მამუკა მდინარაძე ახალ პოზიციაზე გუნდის მხარდაჭერით იმუშავებს – მისი თქმით, მდინარაძის გამოცდილება მნიშვნელოვანი რესურსია, რომელიც ადმინისტრაციული ორგანოების კოორდინაციას მოხმარდება და მის საქმიანობას დამატებითი ხარჯები არ დასჭირდება.

“ჩვენი გუნდიდან ექნება მხარდაჭერა, ჩვენი გუნდისთვის ის არ არის უცხო ადამიანი. ყველამ ვიცით, რომ მამუკა მდინარაძეს აქვს ძალიან დიდი პოლიტიკური და მენეჯერული გამოცდილება, რომელიც ყოველთვის წაადგება ჩვენ გუნდს და ამ შემთხვევაში წადგება იმ სამსახურს, რა სამსახურშიც ის ინიშნება. მას მოემსახურება პრემიერის ადმინისტრაციის აპარატი, დამატებითი ხარჯები არ იქნება მასზე გაწერილი. საჭიროებიდან გამომდინარე ის იქნება კოორდინატორი იმ უწყებების, რომელსაც ჰქვია ადმინისტრაციული ორგანოები და წარუძღვება ამ საქმის კოორდინაციას და მომავალი გვიჩვენებს ყველაფერს” – ამბობს “ტვ პირველთან” რიმა ბერაძე.

პარლამენტი დაჩქარებული წესით იხილავს კანონპროექტს, რომლის საფუძველზეც საქართველოს მთავრობის შემადგენლობაში სამართალდამცავი ორგანოების კოორდინაციის საკითხებში სახელმწიფო მინისტრის თანამდებობა იქმნება. პოსტს მამუკა მდინარაძე დაიკავებს. პარლამენტში შეტანილი კანონპროექტით, მდინარაძეს საკუთარი აპარატიც კი არ ექნება და მის მატერიალურ-ტექნიკურ და ორგანიზაციულ უზრუნველყოფას მთავრობის ადმინისტრაცია განახორციელებს. მდინარაძე სუს-ის უფროსობიდან 21 აპრილს მოხსნეს.