„ერთიანი ნაციონალური მოძრაობის“ ერთ-ერთმა ლიდერმა ლაშა ფარულავამ ანტიკრიზისული პროგრამა: „სამი ნაბიჯი ფასების სტაბილურობისთვის“ წარადგინა.
როგორც ლაშა ფარულავამ განაცხადა, პარტიის პოლიტიკა მიმართული იქნება არა ფასების ხელოვნურ ზრდაზე, არამედ მათ სტაბილიზაციაზე.
„ჩვენი მიზანია „ოცნების“ კორუფციული სქემების დაშლა, საწვავის ფასების სტაბილიზაცია, ენერგოტარიფებში არსებული სისტემური კორუფციის აღმოფხვრა და ქართველი ფერმერისა და გლეხის რეალური მხარდაჭერა.
ჩვენი ანტიკრიზისული გეგმა ითვალისწინებს აქციზის 50%-ით შემცირებას:
ბენზინი: 250 ლარი
დიზელი: 200 ლარი
ბუნებრივი აირი (CNG): 100 ლარი
ნავთობის აირი (LPG): 150 ლარი
შედეგად, საწვავის ფასი შემცირდება 30–40 თეთრით ლიტრზე, რაც შეამსუბუქებს ინფლაციურ წნეხს მოსახლეობაზე.
საწვავის მიმართულებით ჩვენი პრიორიტეტია საქართველოში ნავთობგადამამუშავებელი ქარხნების განვითარება და ინვესტიციების მოზიდვა. ეს ნიშნავს ადგილობრივი წარმოების გაძლიერებას, მაღალანაზღაურებადი სამუშაო ადგილების შექმნას და, რაც მთავარია, რეალური ბერკეტის მიღებას საწვავის ფასებზე გავლენის მოსახდენად
წლის ბოლომდე უნდა გამოცხადდეს მორატორიუმი და შეჩერდეს ელექტროენერგიაზე გაზრდილი ტარიფი.
ივანიშვილის ბიტკოინების გამომუშავებაში დახარჯული თანხები კი ბიუჯეტში დაბრუნდეს“, – განაცხადა ფარულავამ.
მისი თქმით, ასევე, სეზონური საწვავის ვაუჩერები უნდა დარიგდეს, რაც გულისხმობს 100 ლიტრ დიზელს თითოეულ ფერმერსა და გლეხზე, გაზაფხულისა და შემოდგომის სამუშაოებისთვის.
„პროგრამა ორიენტირებულია მცირე და საშუალო მიწათმფლობელებზე.
ფასების პოლიტიკაში ჩვენი ამოცანაა კონკურენციის აღდგენა, ანუ უნდა დაიშალოს მონოპოლიები ბრენდულ პროდუქტებზე და დაშვებული იყოს პარალელური იმპორტი. ეს გაზრდის არჩევანს, გააჩენს რეალურ კონკურენციას და ბუნებრივად შეამცირებს ფასებს.
ჩვენი ხედვა მკაფიოა: სახელმწიფო პოლიტიკა მიმართული იქნება არა ფასების ხელოვნურ ზრდაზე, არამედ მათ სტაბილიზაციაზე. ტარიფები უნდა ასახავდეს რეალურ ეკონომიკურ ხარჯებს და დაცული იყოს „ოცნების“ კორუფციული ზემოქმედებისგან“,- განაცხადა ფარულავამ.