ნინო წილოსანი ევროკავშირის ელჩის განცხადებას აკრიტიკებს და ამბობს, რომ უცხოური ფონდები ქვეყანაში დაპირისპირებასა და ნეგატიურ პროცესებს აფინანსებდნენ.
“არ ვიცი, რამდენად მეგობრულად შეიძლება მივიჩნიოთ სამოქალაქო დაპირისპირების და იმ უბედურების წინასწარმეტყველება თუ სურვილი, რომელიც ბატონმა ელჩმა გამოთქვა. ყოველ შემთხვევაში, სწორედ დაპირისპირებას, სიღატაკეს და ყველანაირ ნეგატიურ განვითარებას ნამდვილად აფინანსებდა ევროკავშირის სხვადასხვა ფონდები. თუ ამ წლების მანძილზე ჩვენ ამ ყველაფერს ვუმკლავდებით, ახლა საინტერესოა, რაიმე კონკრეტული გეგმა ხომ არა აქვთ იმისთვის, რომ ეს, რაზეც ელჩმა ისაუბრა, ახალი დაფინანსების, თუ ახალი შემოტევის ნაკადი და ტალღა მოხდეს” – ამბობს ნინო წილოსანი ევროკავშირის ელჩის განცხადების შეფასებისას, რომელიც “ქართულმა ოცნებამ” მუქარად ჩათვალა და პაველ ჰერჩინსკი საგარეო საქმეთა სამინისტროში დაიბარა.
ბრიუსელში, ევროპის საგარეო ქმედებათა სამსახურში, სადაც დოკუმენტური ფოტოგამოფენა „საქართველო ფოკუსში“ გაიხსნა, ჰერჩინსკიმ თქვა: “საქართველო გზაგასაყარზე დგას. საქართველოს მომავალი ჯერ არ დაწერილა, მაგრამ ის, რაც მომავალ კვირებსა და თვეებში გადაწყდება, განსაზღვრავს, ეკუთვნის საქართველო ევროპული ქვეყნების ოჯახს, რომელიც დაფუძნებულია დემოკრატიაზე, კანონის უზენაესობასა და ადამიანის უფლებებზე, თუ სამწუხაროდ, თავის ბნელ წარსულს დაუბრუნდება.”
ევროკავშირის ელჩი მაკა ბოჭორიშვილს დღეს შეხვდა. მას შეხვედრის დასრულების შემდეგ კომენტარი არ გაუკეთებია.