„ოპოზიციური ალიანსი“ არის პოლიტიკური ერთობა, რომელიც „ოცნების“ პოლიტიკას უწყობს ხელს – რაც ხდება ალიანსში, კითხეთ „ოცნებას“, სუს-ს, ისინი უფრო დეტალურად და კონკრეტულად გეტყვიან მათ გეგმებზე, – ამის შესახებ „გახარია საქართველოსთვის“ დეპუტატმა, გიგა ფარულავამ „ოპოზიციურ ალიანსზე“ საუბრისას განაცხადა.
მისივე თქმით, სუს-ის ყოფილმა ხელმძღვანელმა, მამუკა მდინარაძემ პირდაპირ ეთერში დაადასტურა, რომ „4 ოქტომბრის პროვოკაციული რევოლუციური სცენარი დაგეგმილი იყო „ოცნების“ ოფისში, სუს-ში“.
„რაც ხდება ალიანსში, ჰკითხეთ „ოცნებას“. ისინი უფრო უკეთესად, უფრო კონკრეტულად გეტყვიან, თუნდაც იმ სამოქმედო გეგმებზე, რაც შეიძლება ალიანსს და ამ ოპოზიციურ წარმომადგენლებს ჰქონდეთ. ამაზე რამდენიმე დღის წინ, ღიად, პირდაპირ ეთერში, სუს-ის აწ უკვე ყოფილმა ხელმძღვანელმა თავად ისაუბრა როგორც ამ კონკრეტულ ოპოზიციურ პარტიებში ჩანერგილ ადამიანებზე, ასევე 4 ოქტომბრის პროვოკაციულ მოვლენებზე. ჩვენ წინასწარ ვაფრთხილებდით საზოგადოებას, რომ 4 ოქტომბრის ეს პროვოკაციული რევოლუციური სცენარი დაგეგმილი იყო „ოცნების“ ოფისში, სუს-ში და ეს თავად აღიარა უკვე სუს-იდან გაგდებულმა მდინარაძემ, შესაბამისად, რაც ხდება ალიანსში, კითხეთ „ოცნებას“, სუს-ს. ისინი უფრო დეტალურად და კონკრეტულად გეტყვიან მათ გეგმებზე. ალიანსში შედიან ის პოლიტიკური ჯგუფები, რომლებიც 4 ოქტომბრის პროვოკაციული რევოლუციური სცენარის ორგანიზატორები იყვნენ, რომელიც პირდაპირ ხელს უწყობდა „ოცნების“ პოლიტიკას მაშინ. დღესაც ვხედავთ მათ ბევრ ქმედებას და პოლიტიკურ განცხადებას, მათ შორის, სააკაშვილის, რომელიც ბუნებრივია, „ოცნების“ პროპაგანდას უწყობს ხელს. ალიანსი არის, ჩვენდა სამწუხაროდ, პოლიტიკური ერთობა, რომელიც „ოცნების“ პოლიტიკას უწყობს ხელს“, – განაცხადა ფარულავამ.