შეერთებულ შტატებს მხოლოდ საკუთარი კეთილდღეობა აინტერესებს და მზადაა, დაიცვას იგი გადატრიალებების, ადამიანების გატაცებების ან სხვა ქვეყნების ლიდერების მკვლელობების გზით, – ამის შესახებ რუსეთის საგარეო საქმეთა მინისტრმა, სერგეი ლავროვმა განაცხადა.
„შეერთებულმა შტატებმა ოფიციალურად განაცხადა, რომ არავინ ეუბნება მათ, რა უნდა გააკეთონ. მათ მხოლოდ საკუთარი კეთილდღეობა აინტერესებთ. ისინი მზად არიან, დაიცვან ეს კეთილდღეობა ნებისმიერი საშუალებით – გადატრიალებებით, ადამიანების გატაცებით ან იმ ქვეყნების ლიდერების მკვლელობებით, რომლებიც ფლობენ მათთვის სასურველ ბუნებრივ რესურსებს“, – აღნიშნა ლავროვმა.
რუსეთის საგარეო უწყების ხელმძღვანელის თქმით, შეერთებულმა შტატებმა ორმხრივად მომგებიანი თანამშრომლობისთვის რუსეთის ინტერესები უნდა გაითვალისწინოს.
„ჩვენ თუ მზად ვართ, ჩვენს ტერიტორიაზე ორმხრივად სასარგებლო პროექტები განვახორციელოთ და ამერიკელებს მივაწოდოთ ის, რაც მათ აინტერესებთ, ჩვენი ინტერესების გათვალისწინებით, მაშინ ჩვენი ინტერესებიც უნდა იქნეს გათვალისწინებული. ჩვენ ამას ვერ ვხედავთ“, – აღნიშნა სერგეი ლავროვმა.
რუსეთის საგარეო საქმეთა მინისტრის განცხადებით, მოსკოვის წითელი ხაზები უკრაინაში, დიდი ხანია, განსაზღვრულია და მათ გარკვევაზე საუბარი სასაცილოა.
„ახლა ევროკავშირის ზოგიერთმა ოფიციალურმა პირმა დაიწყო თქმა: „ვნახოთ. გარკვეულ მომენტში, არა ახლა, მაგრამ მოგვიანებით, მოგვიწევს რუსეთთან საუბარი, რათა მისი წითელი ხაზები დავაზუსტოთ და ჩვენი ვაჩვენოთ“. ეს უბრალოდ არასერიოზულია… იმის თქმა, რომ მათ ჩვენი წითელი ხაზების დაზუსტება სჭირდებათ, სასაცილოა. ისინი დიდი ხნის წინ გამოიკვეთა“, – განაცხადა ლავროვმა.