სახელმწიფო უსაფრთხოების სამსახურმა 2025 წლის ანგარიში გამოაქვეყნა, რომელიც პარლამენტს უნდა წარუდგინოს.
სუსი ანგარიშში წერს, რომ 2025 წელს უფლებამოსილმა საგამოძიებო ორგანოებმა სსიპ საქართველოს ოპერატიულ- ტექნიკურ სააგენტოში წარადგინეს მოსამართლის/ზედამხედველი მოსამართლის 2036 განჩინება ფარული საგამოძიებო მოქმედების დაწყების, გაგრძელების, კანონიერად ან უკანონოდ ცნობის შესახებ.
დღეს გამოქვეყნებული ანგარიშის მიხედვით, 2025 წელს საგამოძიებო ორგანოებმა წარადგინეს 96 დადგენილება ფარული საგამოძიებო მოქმედების ჩატარების შესახებ და 22 ბრძანება ელექტრონული თვალთვალის განხორციელებაზე.
ირკვევა, ისიც რომ საანგარიშო პერიოდში პერსონალურ მონაცემთა დაცვის სამსახურის მიერ კონტროლის ელექტრონული სისტემის მეშვეობით ფარული საგამოძიებო მოქმედება შეჩერებულ იქნა 112 შემთხვევაში.
“2025 წელს უფლებამოსილმა საგამოძიებო ორგანოებმა სსიპ საქართველოს ოპერატიულ- ტექნიკურ სააგენტოში წარადგინეს მოსამართლის/ზედამხედველი მოსამართლის 2036 განჩინება ფარული საგამოძიებო მოქმედების დაწყების, გაგრძელების, კანონიერად ან უკანონოდ ცნობის შესახებ, 96 დადგენილება გადაუდებელი წესით ფარული საგამოძიებო მოქმედების ჩატარების შესახებ, 22 ბრძანება ელექტრონული თვალთვალის ღონისძიების განხორციელების შესახებ, 68 განჩინება კომუნიკაციის მაიდენტიფიცირებელი მონაცემების ცენტრალური ბანკიდან ინფორმაციის გამოთხოვის შესახებ.
საანგარიშო პერიოდში პერსონალურ მონაცემთა დაცვის სამსახურის მიერ კონტროლის ელექტრონული სისტემის მეშვეობით ფარული საგამოძიებო მოქმედება შეჩერებულ იქნა 112 შემთხვევაში.
ინსპექტირების პროცედურის ფარგლებში პერსონალურ მონაცემთა დაცვის სამსახურის მიერ დასრულდა:
სააგენტოს ადმინისტრაციულ შენობაში ვიდეომონიტორინგის გზით მონაცემთა დამუშავების კანონიერება. შემოწმების შედეგად კანონის მოთხოვნათა დარღვევა არ გამოვლენილა.
სააგენტოს მიერ ვაკანტურ თანამდებობებზე მისაღები პირების (კანდიდატების) მონაცემების დამუშავების კანონიერება. შემოწმების შედეგად დადგენილ იქნა მონაცემთა დამუშავების კანონით განსაზღვრული მოთხოვნების დარღვევა და სააგენტოს დაეკისრა ადმინისტრაციული სახდელი.
საანგარიშო პერიოდში, ასევე, დაიწყო ფარული ვიდეოჩაწერის ან/და აუდიოჩაწერის ფარული საგამოძიებო მოქმედებების განხორციელების შემოწმების პროცედურა”- წერია ანგარიშში.