ილჰამ ალიევის განცხადებით, სამხრეთ კავკასიაში შექმნილი ახალი რეალობა უნდა დამყარდეს მშვიდობაზე, სტაბილურობასა და უსაფრთხოებაზე, სადაც საქართველო მნიშვნელოვან როლს ასრულებს.
“ახალი რეალობა, რომელიც შექმნილია სამხრეთ კავკასიაში, ამაზეც გვქონდა საუბარი და ამ რეგიონში შემავალი ქვეყნები უნდა დარჩნენ ფოკუსირებულნი, მშვიდობაზე, სტაბილურობასა და უსაფრთხოებაზე. მსოფლიოს სხვადასხვა კუთხეში ირღვევა ეს პრინციპები, ჩვენთან ეს უნდა დარჩეს ურყევი. არ უნდა მოხდეს არც დანაკარგები და მსგავსი მოვლენები ჩვენს რეგიონს არ უნდა შეეხოს. სამხრეთ კავკასიაში ჩვენ წარმოვჩინდებით, როგორც მშვიდობის, სტაბილურობისა და თანამშრომლობის რეგიონი. საქართველო თამაშობს უმნიშვნელოვანეს როლს…” [სინქრონული თარგმანი] – განაცხადა აზერბაიჯანის პრეზიდენტმა ილჰამ ალიევმა ირაკლი კობახიძესთან გამართულ ერთობლივ ბრიფინგზე.
აზერბაიჯანის პრეზიდენტი ილჰამ ალიევი სახელმწიფო ვიზიტით საქართველოში მეუღლესთან ერთად დღეს ჩამოვიდა. მას აეროპორტში მაკა ბოჭორიშვილი დახვდა. ამის შემდეგ ალიევმა გმირთა მოედანზე გმირთა მემორიალი გვირგვინით შეამკო და ასევე პატივი მიაგო აზერბაიჯანის ეროვნული ლიდერის ჰეიდარ ალიევის ხსოვნას. ალიევი უკვე შეხვდა ყაველაშვილსა და კობახიძეს, დღის ბოლოს კი ბიძინა ივანიშვილი ილჰამ ალიევს სოლოლაკის სასახლეში შეხვდება.