მოლდოვის ყოფილმა პრორუსმა პრეზიდენტმა იგორ დოდონმა დელეგაციასთან ერთად საქართველოს პარლამენტში შეხვედრა გამართა – ინფორმაციას თავად იგორ დოდონი სოციალურ ქსელში ავრცელებს. შეხვედრაში მონაწილეობა მიიღეს “ქართული ოცნების” წევრებმა, ისკო დასენმა, გია ბენაშვილმა და მარიამ ლაშხმა.
“ისტორიული მოვლენა: დღეს თბილისში მოლდოვისა და საქართველოს საპარლამენტთაშორისო მეგობრობის ჯგუფების პირველი სხდომა გაიმართა.
საპარლამენტო კოლეგებთან – ბოგდან ცირდეასთან, პეტრუ ბურდუჟასთან, ვასილე კოსტიუკსა და ოლგა ურსუსთან ერთად – შეხვედრა გავმართეთ საქართველოს პარლამენტის დეპუტატთა ჯგუფთან: საქართველო-მოლდოვის მეგობრობის ჯგუფის ხელმძღვანელთან, ისკო დასენთან, აგრეთვე ამ ჯგუფის წევრებთან – გია ბენაშვილსა და მარიამ ლაშხთან.
განვიხილეთ თანამშრომლობა და საქართველოს ღირებული გამოცდილება ეროვნული ინტერესების დაცვის, ეკონომიკური მდგრადობის უზრუნველყოფისა და ტრადიციული ღირებულებების შენარჩუნების საქმეში. აღვნიშნეთ, რომ ეს არის სუვერენიტეტის დაცვასა და სახელმწიფოს განვითარებაზე ორიენტირებული თანმიმდევრული და პრაგმატული პოლიტიკის მაგალითი.
შევთანხმდით კონტაქტების განმტკიცებასა და საპარლამენტო პლატფორმაზე ურთიერთთანამშრომლობის განვითარებაზე” – წერს დოდონი სოციალურ ქსელში.