კახა კალაძე, რომლის საარჩევნო ბანერზე გაკეთებული წარწერის გამო “დროას” ლიდერი, ელენე ხოშტარია ციხეში გაუშვეს, პირველ კომენტარს აკეთებს.
“ელენე ხოშტარიას 4 შვილზე, ცოტა ადრე უნდა ეფიქრა” – თქვა “ტვ პირველის” ჟურნალისტის კითხვის საპასუხოდ კალაძემ, რომელიც თავადაც 4 შვილის მამაა.
“ეს არ იყო უბრალოდ ბანერის ან ფოტოს დაზიანება, ეს იყო საარჩევნო პერიოდში, კამპანიისთვის ხელის შეშლა, მიუხედავად იმისა, რომ არაერთი მოწოდება იყო გაკეთებული. თქვენ ვერ ნახავთ ვერც ერთ ფდაქტს, როცა ჩვენ პოლიტიკოსები, რომელიმე პოლიტიკური პარტიის ოფისთან მივსულიყავით დაგვერბია, შეურაცხყოფა მიგვეყენებინა მათთვის და მათი პლაკატები, ბანერები დაგვეზიანებინა.
რაც შეეხება ქალბატონ ელენე ხოშტარიას, მე არავის ციხეში წასვლა არ მიხარია, თუმცა ჩვენ ყველანი ზრდასრული ადამიანები ვართ, პატარა ბავშვები არ ვართ და ყველა ჩვენს გადადგმულ ნაბიჯზე და გადაწყვეტილებაზე თავადვე ვიღებთ. ქალბატონ ელენე ხოშტარიას ჰქონდა შესაძლებლობა, გადაეხადა გირაო, ეღიარებინა ის, რაც გააფუჭა, მაგრამ ასე ჩათვალა ეს მისი გადაწყვეტილება და მისი უფლებაა” – კახა კალაძე.
ცნობისთვის, მოსამართლე გიორგი არევაძემ ოპოზიციონერ პოლიტიკოსს კახა კალაძის ბანერის დაზიანების საქმეზე 1 წლითა და 6 თვის ვადით პატიმრობა მიუსაჯა.
პატიმრობის ვადის ათვლა დაიწყო გასული წლის 15 სექტემბრიდან, შესაბამისად, ხოშტარიას საპატიმრო დაახლოებით ერთ წელში ამოეწურება.
ელენე ხოშტარია 2025 წლის 15 სექტემბერს დააკავეს. საქმე ეხება კახა კალაძის საარჩევნო ბანერზე ფლომასტერით გაკეთებულ წარწერას: “რუსული ოცნება”. ბრალდების მხარის დათვლით ამ წარწერამ ბანერზე 570 ლარის ზიანი გამოიწვია.