ცნობილია მკვლელობაში ბრალდებულის ვინაობა – ახალი დეტალები დედისა და ძმის მკვლელობის საქმეზე

მკვლელობა მოსკოვის გამზირზე. მამაკაცმა დედა და ძმა მოკლა. არსებული ინფორმაციით, დანაშაულში ბრალდებული 55 წლის კაცი დავით რატიანია.

მეზობლები ჰყვებიან, რომ ქალი ბოლო წლებში საწოლს იყო მიჯაჭვული და გადაადგილება არ შეეძლო.

„ხმაური არ ყოფილა. დილას გავიგე სასწრაფო რომ მოვიდა. ვიფიქრე, რომ მოხუცი ქალი ჰყავდათ ცუდად. მერე პატრულიც მოვიდა… გაჟონა რაღაცებმა რომ ესეთი უბედურება მოხდა. 2 მიცვალებულია. მოხუცებული იყო ეს ქალბატონი, საერთოდ ვერ გამოჰყავდათ გარეთ“ – ამბობს მეზობელი.

დაკავებულს აღკვეთის ღონისძიების სახით პატიმრობა უკვე შეეფარდა.

შსს-ს ცნობით, ის 20 მარტს დააკავეს. კაცს ბრალი ოფიციალურად სსკ-ის 11 პრიმა 109-ე მუხლის „კ“ და „ლ“ ქვეპუნქტებით (ორი პირის განზრახ მკვლელობა, ჩადენილი ოჯახის წევრის მიმართ) წარედგინა. დანაშაული 20 წლამდე ან უვადო თავისუფლების აღკვეთას ითვალისწინებს.