უკრაინის სამხედრო დაზვერვამ რამდენიმე საათის წინ გაავრცელა კადრები, სადაც ასახულია უნგრეთის მოქალაქის, ზოლტან ანდრეიას დაკავება — ის ბრალდებულია კიევში ჯაშუშური ქსელის შექმნასა და უკრაინის თავდაცვის ძალების შესახებ ინფორმაციის რუსეთისთვის მიწოდებაში.
დაზვერვის ინფორმაციით, ანდრეიას საქმიანობა საქართველოსაც უკავშირდება — გავრცელებულ ვიდეომასალაში ჩანს, რომ ის თბილისში უნგრეთის საელჩოსთან იყო დაკავშირებული და ოფიციალურ ღონისძიებებში მონაწილეობდა. გამოძიების ვერსიით, იგი ოთხი წლის განმავლობაში საქართველოში იმყოფებოდა და მოგვიანებით საქმიანობა უკრაინაში გააგრძელა.
საქმე აჩენს კითხვებს უნგრეთის დიპლომატიურ მისიასთან დაკავშირებით — ირკვევა, რომ მის შემადგენლობაში შესაძლოა იმყოფებოდა პირი, რომელიც წლების განმავლობაში აგროვებდა ინფორმაციას რეგიონში. მისი ვინაობა საჯაროდ მხოლოდ მას შემდეგ გახდა ცნობილი, რაც უკრაინის დაზვერვამ ის ჯაშუშურ საქმიანობაში გამოავლინა და ქსელის კიდევ ერთი წევრი დააკავა.
ამასთან, სკანდალში ფიგურირებს უნგრეთის საგარეო საქმეთა მინისტრი პიტერ სიიარტოც — „ვაშინგტონ პოსტის“ ინფორმაციით, ის ევროპული საბჭოს შეხვედრების დროს რუს კოლეგას, სერგეი ლავროვს, კონფიდენციალურ ინფორმაციას უზიარებდა. გავრცელებული ცნობებით, ევროკავშირში არ გამორიცხავენ, რომ მსგავსი ქმედებების გამო უნგრეთის მთავრობა გარკვეული მოლაპარაკებებიდან ჩამოშორდეს.