ლევან ჯანგველაძის მკვლელობიდან ერთი წლის შემდეგ ოჯახი ახალ ვერსიაზე საუბრობს. კანონიერი ქურდის ძმის ნათესავებს კითხვები აქვთ ჯანგველაძის დაცვის წევრთან და იმ მეგობართან, ვინც საბედისწერო ღამეს თბილისში მოკლულ ბიზნესმენთან ერთად გადაადგილდებოდა. სასამართლოში მოწმემ ყურადღება გაამახვილა რამდენიმე გარემოებაზე — რატომ ვერ მოახერხა 17-წლიანი გამოცდილების მქონე სპეცრაზმელმა თავდამსხმელის მიმართულებით საპასუხო გასროლა და რატომ დატოვა კახა ძანძავამ დაჭრილი ლევან ჯანგველაძე შემთხვევის ადგილზე.
მიხეილ ბერძენიშვილი ლევან ჯანგველაძისთვის მხოლოდ ნათესავი არ ყოფილა — ის ბიზნესმენის დაცვის ფუნქციასაც ასრულებდა და თბილისში ყოფნისას, როგორც წესი, მასთან ერთად გადაადგილდებოდა. სწორედ ამ გარემოების გამო ბერძენიშვილი ორჯერ შეხვდა საქართველოს ყოფილ გენერალურ პროკურორს, ოთარ ფარცხალაძეს და მისი თქმით, რამდენჯერმე მოისმინა დაძაბული სატელეფონო საუბრები სიგარეტის ბიზნესთან დაკავშირებით.
აღნიშნულ ვერსიაზე გამოძიება მუშაობს. სისხლის სამართლის გამოყოფილ საქმეში, სადაც ბრალდებული ყოფილი გენერალური პროკურორი ოთარ რომანოვ-ფარცხალაძეა, სამართალდამცველები ამ დრომდე იკვლევენ, ჰყავდა თუ არა დანაშაულებრივ ჯგუფს თანამზრახველები.