“როგორც 2012 წელს “იმედის” ბედის გადაწყვეტაში ერთ-ერთი მთავარი მოქმედი პირი, მზად ვარ მოვყვე, რა და როგორ იყო” – პოლიტოლოგი გია ხუხაშვილი :ტელეკომპანია “იმედთან” დაკავშირებით სოციალურ ქსელში განცხადებას ავრცელებს.
“იმედი რომ მხნედ არის და თავს წარმატებულად აცხადებს, გავიგე.
უბრალოდ ერთი კითხვა მაქვს – როგორ შეიძლება წარმატებულად ჩაითვალოს კომპანია, რომლის ხარჯები წლიდან წლამდე მინიმუმ 2-ჯერ მეტია მის კომერციულ შემოსავლებზე.
როგორც ამბობენ, თითქმის ნახევარი მილიარდი ვალი აქვს, რომელსაც “რატომღაც” არავინ თხოვს.
ცივილიზებულ სამყაროში, ასეთი კომპანია დიდი ხნის გაკოტრებული იქნებოდა.
ცალკე თემაა, საიდან და რა წესით იფარება ეს დეფიციტი.
“პირველივე მოსახვევში” მეპატრონე გაექცათ და ამხელა ტვირთი გამოუცდელ ადამიანებს აკიდა.
ბადრის სახელს კი ტყუილად ახსენებენ, რადგან მისგან განსხვავებით, ისინი მოქმედ ხელისუფლების ხაზს ატარებენ განსაკუთრებული გააფთრებით, რაც თავისთავად მეტყველებს მათ “დამოუკიდებლობაზე”.
თუ რეალურად აინტერესებთ, რა და როგორ იყო და არის ტელევიზიასთან დაკავშირებით, როგორც 2012 წელს მისი ბედის გადაწყვეტაში ერთ-ერთი მთავარი მოქმედი პირი, მზად ვარ, პირდაპირ ეთერში მოვუყვე მის თანამშრომელთა იმ ნაწილს, რომელიც გაურკვევლობაშია დღემდე….: – წერს გია ხუხაშვილი.