ნიკო კვარაცხელიას მკვლელობის საქმის პროკურორი, გია შაიშმელაშვილი პასუხობს შეკითხვას: „რატომ დასჭირდა საქმის გახსნას ხუთი წელი და ამ დრომდე რატომ არ გასაჯაროვდა ვიდეომტკიცებულებები“.
მისი თქმით, განსაკუთრებული სირთულის საქმეს განსაკუთრებული სიფრთხილით და ძალისხმევით სჭირდება მტკიცებულებების მოპოვება.
საქმის მოცულობა იცით რამდენია? საქმის მასალები, გარდა ვიდეომტკიცებულებებისა, სატელეფონო კომპანიებიდან გამოთხოვილი ინფორმაციისა, GPS მონაცემებისა, ამ ყველაფრის გარდა საქმის მასალები დღეის მდგომარეობით უკვე 28 ტომია, ყველა ტომში 250 ფურცელია. ეს ინფორმაცია არ არის ქაღალდები, ეს არ არის ჩვეულებრივი დოკუმენტაცია, ეს ყველა არის სათითაოდ მტკიცებულება, რომელიც ამ ფაქტობრივ გარემოებებს ადასტურებს და ამას შეკრება სჭირდება. ამ კატეგორიის ბრალდება, რომელიც მოიცავს განზრახ მკვლელობის შეკვეთილ პირთა ჯგუფის მიერ ორგანიზებას, დამეთანხმებით არ არის ადვილი საქმე. ამ განსაკუთრებული სირთულის საქმეს განსაკუთრებული სიფრთხილით და ძალისხმევით სჭირდება მტკიცებულებების მოპოვება. ეს მტკიცებულებები შესაბამისად უნდა ყოფილიყო მოპოვებული. ჩვენ ვერც სასამართლოს და ვერც დაზარალებულის წინაშე ვერ წარმოვდგებოდით სანახევროდ მოპოვებული ინფორმაციით“, – განაცხადა გია შაიშმელაშვილმა.
ამასთან მისივე თქმით, ბრალდების მხარისთვის არ არის ცნობილი, სად იმყოფება ბრალდებული, ბესარიონ ჟვანია.
შაიშმელაშვილის განცხადებით, კანონით გათვალისწინებულ ყველა ზომას გაატარებენ, რომ ბესარიონ ჟვანია წარმოდგენილი იყოს სამართალდამცავ უწყებაში.