“მეცოდებიან, რაღა უნდა მოხდეს, რომ ქართველმა ხალხმა მათ ეს შეცდომა აპატიოს?! ეს არის უზნეო საქციელი, რომელსაც არცერთი თაობის წარმომადგენელი არ აპატიებს”, – ასე შეაფასა საქართველოს კულტურის პალატის პრეზიდენტმა, დავით ოქიტაშვილმა “რუსთავი 2”-ის გადაცემაში “ღამის პრაიმ-თაიმი”, კრემლში ჩატარებული კონცერტი, სადაც ქართველები იღებდნენ მონაწილეობას.
„როგორ შეიძლება ეს ნორმალურმა ადამიანმა გაამართლოს?! – ვის უმღერით – კრემლის დარბაზში დედებს, რომლებიც იცინიან იმ დროს, როცა უკრაინაში დედები შვილებს კარგავენ?! – ვერც ვლაპარაკობ, ჩემთვის ეს იმდენად მიუღებელია, ვერც დავიჯერე, როდესაც ეს გავიგე. ჩემდა საუბედუროდ, არიან ადამიანები, ვინც ამას ამართლებენ. იცით, ვინ ამართლებს? ბევრს რომ ჭკუას გვარიგებენ და გვიხსნიან, რომ რუსეთი ოკუპანტია. ძალიან მძიმე რაღაცას ვიტყვი, როგორ შეიძლება გაამართლო ადამიანი, როდესაც უკრაინაში დაღუპული ბიჭების გვამებზე ფეხით დადიან და მღერიან. როგორც შეიძლება ოკუპანტს კრემლის დარბაზში გაუცინო, უმღერო, როდესაც რამდენიმე კილომეტრში ჩვენი დები და ძმები იღუპებიან, ეს ყოვლად მიუღებელია.
რთულია ქართველებზე ასე ვისაუბროთ, მაინც ჩვენი თანამემამულეები არიან და მეცოდებიან, რაღა უნდა მოხდეს, რომ ქართველმა ხალხმა მათ ეს შეცდომა აპატიოს?! – ეს აღარასოდეს მოხდება. ეს არის უზნეო საქციელი, რომელსაც არცერთი თაობის წარმომადგენელი არ აპატიებს”, – ამბობს დავით ოქიტაშვილი გადაცემაში “ღამის პრაიმ-თაიმი”.