თავდაცვის ყოფილი მინისტრის ცოლი, ანი ნადარეიშვილი სოციალურ ქსელში ბაჩო ახალაიას ხმის ნიმუშის ჩანაწერს ავრცელებს.
ანი ნადარეიშვილი წერს, რომ “სისხლის სამართლის საქმეში დევს ამ ექსპერტიზის პასუხი, რომ ჩანაწერი თავიდან ბოლომდე ყალბია და ხელოვნური ინტელექტის მეშვეობით არის გენერირებული”, რასაც პროკურატურა არ ასაჯაროებს.
“როგორც გახსოვთ 10 ოქტომბერს ბაჩო დაიბარეს კრიმპოლში, მისი და ბატონი პაატა ბურჭულაძის ყალბი ჩანაწერის ექსპერტიზისთვის ხმის ნიმუშის ასაღებად.
ეს აუდიო-ჩანაწერი ბაჩოს ხმის ნიმუშია, რომელიც იქ აუღეს იმ დღეს – წიგნებზე ესაუბრება ექსპერტს.
და რაც მთავარია – სისხლის სამართლის საქმეში დევს ამ ექსპერტიზის პასუხი, რომ ჩანაწერი თავიდან ბოლომდე ყალბია და ხელოვნური ინტელექტის მეშვეობით არის გენერირებული! ამას არ ასაჯაროებს პროკურატურა!
ამიტომ დახურეს სასამართლო პროცესი და ადვოკატებს ხელი მოაწერინეს გაუთქმელობაზე, რომ თქვენ არ გაიგოთ სიმართლე! მაგრამ მე ყველაფერს მოგიყვებით,” – წერს ანი ნადარეიშვილი.
ცნობისთვის, თავდაცვის ყოფილი მინისტრი, ბაჩო ახალაია, რომელიც “ქართული ოცნების” ხელისუფლებაში მოსვლისთანავე დააკავეს და 9-წლიანი პატიმრობა მოიხადა, 25 დეკემბერს კვლავ დააკავეს.
ცნობისთვის, თავდაცვის ყოფილი მინისტრი ბაჩო ახალაია 25 დეკემბერს დააკავეს. ბაჩო ახალაიას ბრალდება პროკურატურამ ჯგუფური ძალადობის ორგანიზებისა და ხელმძღვანელობის ფაქტებზე წარუდგინა. კერძოდ, ბაჩო ახალაიას ბრალდება საქართველოს სისხლის სამართლის კოდექსის 225-ე მუხლის პირველი ნაწილით ჯგუფური ძალადობის ორგანიზება და ხელმძღვანელობა წარედგინა, რაც სასჯელის სახედ და ზომად 9 წლამდე თავისუფლების აღკვეთას ითვალისწინებს.
4 ოქტომბერს თავდაპირველად პროსახელისუფლებო ტელეკომპანია “იმედმა”, ხოლო შემდეგ სხვა მედიასაშუალებებმა – საზოგადოებრივმა მაუწყებელმა; აჭარის საზოგადოებრივმა მაუწყებელმა; ნიუსჰაბმა; Ongo-მ; რეპორტიორმა; მხარემ; The Georgian Times-მა; საინფორმაციო სააგენტო Info 9-მ; დაიჯესტმა; Exclusive Media-მ, რეზონანსმა; ასევე, სხვა ფეისბუქ-გვერდებმა და ანგარიშებმა (1;2;3;4;5) გაავრცელეს აუდიოჩანაწერი, რომელშიც, მათი ინფორმაციით, ბაჩო ახალაიას და პაატა ბურჭულაძის საუბარია ასახული. მედიასაშუალებების ნაწილი აღნიშნავდა, რომ ჩანაწერის ავთენტიკურობა დადასტურებული არ არის.
4 ოქტომბრის მოვლენებთან დაკავშირებთ ბაჩო ახალაია კრიმინალური პოლიციის დეპარტამენტში დაკითხვაზე დაიბარეს და მისგან ხმის ნიმუში აიღეს.