ადვოკატ გაგი მოსიაშვილის განცხადებით, ლევან ჯანგველაძის შეკვეთით და ანგარებით განზრახ მკვლელობის ორგანიზებაში ბრალდებული ყოფილი გენერალური პროკურორს, ოთარ რომანოვ-ფარცხალაძის საქმე 32-ტომიანია, სადაც მხოლოდ 3 მოწმის ჩვენებაა.
უფლებადამცველის, გაგი მოსიაშვილის თქმით, ფარცხალაძე ამ მძიმე დანაშაულში ბრალდებულად მხოლოდ ირიბი ჩვენების საფუძველზეა წარმოდგენილი.
ყოფილი გენერალური პროკურორის კიდევ ერთი ადვოკატის, მერაბ ჩიქოვანის განცხადებით კი, ბრალდების მხარეს ოთარ ფარცხალაძე გამოკითხვაზე არც კი დაუბარებია.
„არ უთქვამთ, მობრძანდი, შენთან კითხვები გვაქვსო… არის სატელეფონო შეტყობინების ოქმი, რომ ურეკავენ ოჯახს და ეუბნებიან, გთხოვ, წარმოადგინოთ ადვოკატიო… ეს არის შეტყობინების სტანდარტი?”, – განაცხადა ჩიქოვანმა.
ცნობისთვის, ლევან ჯანგველაძის შეკვეთით და ანგარებით განზრახ მკვლელობის ორგანიზებაში ბრალდებულ ყოფილ გენერალურ პროკურორს, ოთარ რომანოვ-ფარცხალაძეს აღკვეთის ღონისძიების სასით პატიმრობა დაუსწრებლად შეეფარდა. ფარცხალაძეს ბრალი საქართველოს სისხლის სამართლის კოდექსის 25/109-ე მუხლის ,,ნ“ ქვეპუნქტით წარედგინა, რაც შეკვეთით და ანგარებით განზრახ მკვლელობის ორგანიზებას გულისხმობს. აღნიშნული დანაშაული სასჯელის სახედ და ზომად 16-დან 20-წლამდე ან უვადო თავისუფლების აღკვეთას ითვალისწინებს.