ვლადიმერ პუტინმა ხელი მოაწერა კანონს, რომელიც რუსეთში საერთაშორისო სასამართლოების გადაწყვეტილებების აღსრულებას კრძალავს, – ინფორმაციას რუსული მედია ავრცელებს.
რუსეთის პრეზიდენტის, ვლადიმერ პუტინის მიერ ხელმოწერილი კანონის თანახმად, რუსეთი უცხოური სისხლის სამართლის სასამართლო ორგანოებისა და იმ საერთაშორისო სასამართლოების გადაწყვეტილებებისგან თავისუფლდება, რომელთა იურისდიქცია მოსკოვთან დადებულ ხელშეკრულებას ან გაერო-ს უშიშროების საბჭოს რეზოლუციას არ ეფუძნება.
რუსეთის ადვოკატთა ასოციაციის საბჭოს თავმჯდომარემ, ვლადიმერ გრუზდევმა განაცხადა, რომ კანონი სისხლის სამართლის საერთაშორისო სასამართლოს მიერ გამოტანილ განაჩენებს შეეხება.
შეგახსენებთ, სისხლის სამართლის საერთაშორისო სასამართლომ 2023 წლის მარტში ვლადიმერ პუტინისა და რუსეთის ბავშვთა უფლებების კომისრის, მარია ლვოვა-ბელოვას დაპატიმრების ორდერები გასცა. მათ ბრალი უკრაინაში ომის დანაშაულების ჩადენაში ედებათ.