“გადაცმულნი არიან…” – ზაზა პაპუაშვილმა ჟურნალისტები ლურჯ მელიას შეადარა

მსახიობმა, საპარლამენტო უმრავლესობის ყოფილმა დეპუტატმა ზაზა პაპუაშვილმა MIX- “მეტრონომთან” საუბარში, დღევანდელი ქართულ მედიაზე საუბრისას აღნიშნა, რომ კვალიფიკაციის პრობლემაა და სანამ პროფესიონალიზმის დონე არ გაიზრდება, იქამდე მაღალ მატერიებზე საუბარი რთულია.

ზაზა პაპუაშვილმა ჟურნალისტთა ნაწილი ლურჯ მელიას შეადარა.

,,როგორც თქვენი, ბეჭდური მედია, ისე ტელევიზია, არის ძალიან დაბალი დონის, ასე ვფიქრობ იმიტომ, რომ როგორც ჩვენ ვიქცევით, როგორც ერთმანეთს ვექცევით, როგორც ქვეყანას ვექცევით, როგორც ვვაზროვნებთ, ძალიან დიდი სიმაღლეების დაპყრობის იმედად მე არ ვარ.

როგორც საზოგადოებაა დაჩეხილი, ისეა ტელევიზიებიც, ამისტებად და იმისტებად, ეს მალე უნდა ჩაბარდეს წარსულს. ცოტა რაღაც კვალიფიკაცია, დონე უნდა ავწიოთ, რომ უფრო მაღალ მატერიებზე ვილაპარაკოთ და კარგად ვიცხოვროთ. ახლა ვართ იქ, სადაც ვიმსახურებთ.

ჟურნალისტიკა ძალიან მნიშვნელოვანი პროფესიაა, მაგრამ ჟურნალისტების უმრავლესობა გადაცმულნი არიან, როგორც ლურჯი მელიები, ირქმევენ ჟურნალისტებს… მათი კვალიფიკაცია, საუბრის მანერა, განათლება, პროფესიონალიზმი არის – ნულის დონე, რა თქმა უნდა, ყველას არ ეხება, ასეთი თითზე ჩამოსათვლელია, მაგრამ ეს არის დაბალი დონე.

არც პრესაში და არც ტელევიზიაში, რამდენიმე გადაცემის გარდა არ შეიხედება“, – განაცხადა პაპუაშვილმა MIX – მეტრონომთან საუბარში.