“ნულის ტოლი იყო მაინც” – ბიძინა კულუმბეგოვი მწვანე პასპორტის მოთხოვნის ვალდებულების გაუქმებაზე

საქართველოში ე.წ. მწვანე პასპორტის მოთხოვნის ვალდებულების გაუქმებას ალერგოლოგ-იმუნულოგი ბიძინა კულუმბეგოვი სოციალურ ქსელში ეხმაურება:

“ამ ფორმით პასპორტს ჯობია არ გვქონდეს!პ.ს. დახვეწის და გაუმჯობესების შანსი აქ – ნულის ტოლი იყო მაინც”, – წერს კულუმბეგოვი “ფეისბუქი”-ს პირად გვერდზე.

საკოორდინაციო საბჭოს მიერ მიღებული გადაწყვეტილებით, მწვანე პასპორტის მოთხოვნის ვალდებულება უქმდება, თუმცა აღრიცხვიანობის ყველა სისტემა კვლავ მოქმედი რჩება და ის პირები, რომლებსაც მწვანე პასპორტი საზღვარგარეთ გასამგზავრებლად ესაჭიროებათ, კვლავ შეძლებენ ამ მექანიზმით სარგებლობას – ამის შესახებ საკოორდინაცო საბჭოს ხელმძღვანელმა გიორგი ღიბრაძემ რამდენიმე წუთის წინ განაცხადა.

“ომიკრონის” გავრცელების სწრაფი ტემპისა და ვირუსის სუსტი მიმდინარეობის, ასევე მსოფლიო პრაქტიკის გათვალისწინებით, “მწვანე პასპორტის” მოთხოვნის ვალდებულება უქმდება,” – აღნიშნული გადაწყვეტილება უწყებათაშორისი საკოორდინაციო საბჭოს დღევანდელ სხდომაზე მიიღეს, რომელიც პრემიერ-მინისტრ ირაკლი ღარიბაშვილის ხელმძღვანელობით, ვიდეოკონფერენციის ფორმატში გაიმართა.

ამის მიუხედავად, აღრიცხვიანობის ყველა სისტემა კვლავ მოქმედი რჩება და ის პირები, რომლებსაც „მწვანე პასპორტი“ საზღვარგარეთ გასამგზავრებლად ესაჭიროებათ, კვლავინდებურად შეძლებენ ამ მექანიზმით სარგებლობას.