რა ვითარებაში მოხდა მიხეილ სააკაშვილის გადაყვანა პენიტენციურ დაწესებულებაში – როგორც ირკვევა, საქართველოს მესამე პრეზიდენტს, დღეს, 18:00 საათამდე ინფორმაცია არ ჰქონდა, რომ მას ციხეში დააბრუნებდნენ.
კლინიკა “ვივამედიდან” გაწერის შესახებ ინფორმაციას არ ფლობდნენ არც მიხეილ სააკაშვილის ადვოკატები.
“ვივამედის” კლინიკური დირექტორის, ზურაბ ჩხაიძის ინფორმაციით, დღეს, 6 საათამდე საქართველოს მესამე პრეზიდენტს მნახველები ჰყავდა, რის შემდეგაც მკურნალი ექიმი, გაესაუბრა მას, აუხსნა მდგომარეობა და აცნობა, რომ ციხეში უნდა დაბრუნებულიყო. მისი განცხადებით, მიხეილ სააკაშვილმა აღნიშნული ინფორმაცია მშვიდად მიიღო.
პაციენტი დღეს გაეწერა ჩვენი კლინიკიდან. იცით, რომ იმყოფებოდა სტაციონარულ მკურნალობაზე, მისი მდგომარეობა იყო დამაკმაყოფილებელი ამ პერიოდში, შესაბამისად მიღებული იქნა გადაწყვეტილება მისი გაწერის შესახებ, ვინაიდან პაციენტის ჯანმრთელობის მდგომარეობა არ შეესაბამებოდა სტაციონარში ყოფნის კრიტერიუმებს.
რა თქმა უნდა, ეს გადაწყვეტილება, როგორც სხვა ნებისმიერ პაციენტთან, მიიღება მკურნალი ექიმის მიერ, ერთობლივად, სხვადასხვა სპეციალობის ექიმების ჩართულობით.
არა, რა შუაშია არასამუშაო დრო, არასამუშაო დრო არაფერ შუაშია, მას სამუშაო საათების განმავლობაში, თუ თქვენ გულისხმობთ 6 საათამდე პერიოდს, ჰყავდა მნახველი, ამიტომ მნახველის გამოსვლის შემდეგ შევიდა მკურნალი ექიმი, გაესაუბრა მას, აუხსნა მდგომარეობა და აცნობა მას.
არანაირი ძალის გამოყენებით. არა, მე რამდენადაც მაქვს ინფორმაცია, მან ძალიან მშვიდად მიიღო ეს ინფორმაცია.
მე ვერ გეტყვით, ადვოკატს ჰქონდა ინფორმაცია, არ ჰქონდა მე არ ვიცი ამის შესახებ.
მისი ჯანმრთელობის მდგომარეობა არის დამაკმაყოფილებელი, ყველა სასიცოცხლო პარამეტრი არის ნორმის ფარგლებში,” – განაცხადა ზურაბ ჩხაიძემ.