კომპანია Microsoft-ის დამაარსებელი და ყოფილი ხელმძღვანელი ბილ გეიტსი ჩინეთი გავრცელებული ახალი კორონავირუსის 2019-nCoV-ის წინააღმდეგ ბრძოლაში ჩაერთო და 10 მილიონი დოლარი გადარიცხა. ამის შესახებ გეიტსისა და მისი ცოლის საქველმოქმედო ფონდის ვებგვერდზე წერია.
ამ თანხიდან 5 მილიონი უშუალოდ დაავადებასთან ბრძოლას მოხმარდება და ის სახელმწიფო და კერძო ორგანიზაციებს გადაერიცხებათ, რომლებიც დაავადების კონტროლით და დაინფიცირებულების ზრუნვით არიან დაკავებულები, დანარჩენ თანხას კი დაავადების კონტროლისა და აღკვეთის აფრიკული ცენტრი მიიღებს.
ბოლო მონაცემებით, ჩინეთში კორონავირუსით უკვე 80 ადამიანი გარდაიცვალა, ინფიცირებულთა რიცხვმა კი 2744-ს მიაღწია. ინფორმაციას ამის შესახებ BBC ავრცელებს.
ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. ვირუსი უკვე დაფიქსირდა ჩინეთის გარეთ – ტაილანდში, აშშ-ში, სინგაპურში, ავსტრალიაში, ტაივანზე, მალაიზიაში, იაპონიაში, საფრანგეთში, სამხრეთ კორეაში, ვიეტნამსა და კანადაში.