შემზარავია გლდანის №8 პენიტენციური დაწესებულების ყოფილი უფროსის ამბავი, – ამის შესახებ ადვოკატი თორნიკე მიგინეიშვილი სოციალურ ქსელში წერს, რომელიც ციხის ყოფილი უფროსის, დავით გოგობერიშვილის გარდაცვალების ამბავს ეხმაურება.
მიგინეიშვილის თქმით, დავით გოგობერიშვილი პროფესიონალი, რომელიც ყოველთვის ცდილობდა (კანონის ფარგლებში) გვერდში დადგომოდა თითოეულ პატიმარს.
“შემზარავია გლდანის №8 პენიტენციური დაწესებულების ყოფილი უფროსის ამბავი.
დავითი 16 იანვარს გავიცანი, როცა, წლების შემდეგ, პირველად ანდროსთან ციხეში ევროსაბჭოს საპარლამენტო ასამბლეის წევრები შევიყვანე. რა თქმა უნდა, მისი როლი დიდი იყო ამ ამბავში.
რთულად მოიძებნება პატიმარი, რომელიც დავითის მიმართ პრეტენზიას გამოხატავდა.
ის იყო პროფესიონალი, რომელიც ყოველთვის ცდილობდა (კანონის ფარგლებში) გვერდში დადგომოდა თითოეულ პატიმარს და მათთვის მოეგვარებინა ყოველდღიური საჭიროებები.
განსაკუთრებული ყურადღებით გამოირჩეოდა სინდისის პატიმრების მიმართ.
სამწუხაროა, ძალიან.” – წერს თორნიკე მიგინეიშვილი.
შეგახსენებთ, დღეს ცნობილი გახდა, რომ გლდანის პენიტენციური დაწესებულების ყოფილი დირექტორი დავით გოგობერიშვილი გარდაცვლილი იპოვეს.
ცხედარი ექსპერტიზაზეა გადასვენებული. გარდაცვალებასთან დაკავშირებით ასევე ცნობილი ხდება, რომ მისი ცხედარი წყალტუბოს ქუჩაზე, მისივე ავტოფარეხში გამთენიისას იპოვეს.