„რადიო თავისუფლების“ ინფორმაციით, რუსეთის გენერალურმა პროკურატურამ ალეკო ელისაშვილზე, უკრაინის მხარეს ბრძოლისთვის, საერთაშორისო ძებნა გამოაცხადა.
ელისაშვილს ბრალი დაუსწრებლად წაუყენეს რუსეთის ფედერაციის სისხლის სამართლის კოდექსის 359-ე მუხლის მე-3 ნაწილით, რაც შეიარაღებულ კონფლიქტში დაქირავებულ მონაწილეობას გულისხმობს.
„რუსეთის პროკურატურის თანახმად, 2022 წლის მარტში ელისაშვილი უკრაინაში ქართული ლეგიონის შემადგენლობაში იბრძოდა. მონაწილეობდა უკრაინის ტერიტორიაზე სამხედრო ოპერაციებში, მათ შორის კიევის ოლქის ქალაქ ირპენის ბრძოლებში. 2022 წლის აპრილში მან დატოვა უკრაინის ტერიტორია და დაბრუნდა საქართველოში“ — წერს „რადიო თავისუფლება“
ალეკო ელისაშვილს აღკვეთის ღონისძიებად დაუსწრებლად პატიმრობა შეუფარდეს.