“ყოფილმა მეუღლემ რა გარემოებებში მიიღო ფიზიკური დაზიანებები, ამასთან დაკავშირებით ექსპერტიზებია დანიშნული და ამის გარკვევას დრო დასჭირდება”- აცხადებს „ქართული ოცნების“ ყოფილი დეპუტატის, ვეტერანი მოჭიდავის, ლუკა კურტანიძის ადვოკატი, ივანე მეფარიშვილი.
“ლუკას მხარდამჭერებს მინდა მივმართო.. ვინც იცნობს, იცის რომ ლუკამ ხალხის და ქვეყნის სიყვარულში გაატარა დრო”- განაცხადა ადვოკატმა.
ყოფილ დეპუტატს, ვეტერან მოჭიდავეს ლუკა კურტანიძეს აღკვეთის ღონისძიების სახით პატიმრობა შეეფარდა. პროკურატურა ლუკა კურტანიძისთვის პატიმრობას ითხოვდა, დაცვის მხარე კი 50 000-ლარიანი გირაოს გამოყენებას.
ცნობისთვის, “ოცნების” ყოფილი დეპუტატი, ლუკა კურტანიძე 27 ივლისს დააკავეს. ლუკა კურტანიძეს ბრალდება ოჯახის წევრის მიმართ ძალადობის, ოჯახის წევრის ნივთის განზრახ დაზიანებისა და ოჯახის წევრის მიმართ დამცავი ორდერით გათვალისწინებული მოთხოვნების და ვალდებულებების შეუსრულებლობის მუხლით წარედგინა.
მომდევნო სხდომა 17 სექტემბერს გაიმართება.