თბილისის მერმა, კახა კალაძემ გუშინ, სადგურის მოედანზე კორპუსის ფასადის ჩამონგრევის შესახებ კიდევ ერთი კომენტარი გააკეთა.
„ჩემი შეცდომა იყო, როდესაც ვთქვი, რომ მეხუთე კატეგორია აქვს, შენობას აქვს მესამე კატეგორია. თუმცა, კიდევ ერთხელ ხაზს ვუსვამ იმას, რომ არსებითი მნიშვნელობა არ აქვს იქიდან გამომდინარე, რომ ამ კონკრეტულ შენობაში ხალხი ცხოვრობდა მიუხედავად იმისა, რომ არაერთი შეხვედრა გაიმართა გამგეობის მხრიდან…
ტყუილია [დადგენილების ცვლილება]. კახა კალაძე, ქალაქის მერი, სრული პასუხისმგებლობით გეუბნებით, რომ ამ ტიპის საკანონმდებლო ცვლილებები არ განხორციელებულა.
აბსოლუტურად სხვა რამეზე საუბრობთ თქვენ და გაქვთ მცდელობა, რომელიღაცა, არ ვიცი ვინ გააკეთა განცხადება და იმეორებთ ტყუილ ინფორმაციას. სრული პასუხისმგებლობით ვამბობ, თუ ეს არასწორია, დღესვე დავტოვებ თანამდებობას. რომ არანაირი საკანონმდებლო ცვლილებები არ განხორციელებულა და 100%-იანი თანხმობის გარეშე მუნიციპალიტეტს არ აქვს არანაირი უფლება, რომ ხალხი გამოყაროს…
როდესაც არის ისეთი ტერიტორიები, რომელიც გეოლოგიურად საშიშია და ურბანულად არასწორია იქ რაიმეს გაკეთება, მაგ შემთხვევაში ჩვენ 100%-იანი თანხმობის გარეშე გვაქვს იმის უფლება, რომ დავიწყოთ პროცესი“, – თქვა კალაძემ.
შეგახსენებთ, კალაძემ გუშინ თქვა, რომ „კორპუსი ავარიული იყო და ეს ადგილობრივმა მოსახლეობამ იცოდა, თუმცა ქირით გაყვანაზე უარი განაცხადეს.“
მოგვიანებით გავრცელდა ინფორმაცია, რომ 2023 წელს დადგენილება შეიცვალა და ავარიული კორპუსიდან მოსახლეობის გაყვანას მათი თანხმობა არ სჭირდება.
ცნობისთვის, ფასადის ჩამონგრევის შედეგად, დაიღუპა 2 ადამიანი, დაშავდა 1.