სოციალურ ქსელში გავრცელებულ ატმის შეღებვის ფაქტის ამსახველ ვიდეომასალასთან დაკავშირებით, სურსათის ეროვნულმა სააგენტომ რეაგირებისთვის სამართალდამცავ ორგანოებს მიმართა.
მომხდარს „პრაიმტაიმთან“ სურსათის უვნებლობის სპეციალისტი ირაკლი არაბული ეხმაურება.
„ფაქტი რაც მოხდა არის ძალიან ცუდი, კატასტროფა. სისხლის სამართლის დანაშაულია, ეს არის სურსათის ფალსიფიცირება. როცა კარგად დავაკვირდი შეფუთვას და მოვიძიე ინფორმაცია, ეს არის ჩვეულებრივი საღებავი, რომელიც გამოიყენება ინტერიერის, ექსტერიერის და მანქანის შესაღებად. ასეთი პროდუქტები განაპირობებენ იმას, რომ ამდენი დაავადებაა ქვეყანაში და ასეთი ცუდი მდგომარეობა გვაქვს ჯანმრთელობის მხრივ.
ეს საღებავი არის ჩვეულებრივი კანცეროგენი, რომელიც ორგანიზმიდან მალე არ გამოდის და შესაძლოა გახდეს კიბოს გამომწვევი მიზეზი. ნებისმიერ სხვა ხილში შეიძლება გამოიყენონ მათ შორის ვაშლზეც. ფიქრობ, ეს არ იქნებოდა პირველი შემთხვევა….
სურსათის ეროვნულმა სააგენტომ უნდა მოიძიოს და სამართალდამცავ ორგანოებთან ერთად მკაცრად უნდა მოსთხოვოს პასუხი…“ – ამბობს ირაკლი არაბული ჩვენთან საუბრისას.