სომხეთში, ეჩმიაძინის საკათედრო ტაძართან, სადაც პატრიარქ-კათალიკოსი გარეგინ II იმყოფება, პოლიციაა მობილიზებული.
სამართალდამცავები მთავარეპისკოპოსის, მიქაელ აჯაფაჰიანის დაკავებას ცდილობენ, რომლის წინააღმდეგაც სახელმწიფო გადატრიალებაში მონაწილეობის მიღების მუხლით, სისხლის სამართლის საქმეა აღძრული.
Armenpress-ის მიხედვით, პოლიციასა და ეკლესიის ტერიტორიაზე მყოფ პირებს შორის შეხლა-შემოხლა მოხდა, რის შემდეგაც, მთავარეპისკოპოსმა თქვა, რომ ის თავისი ნებით გაყვებოდა სამართალდამცავებს. ბრალდებული ბრალს არ აღიარებს.
შეგახსენებთ, 25 ივნისს, სომხეთის პრემიერ-მინისტრმა, ნიკოლ ფაშინიანმა თქვა, რომ სამართალდამცავმა ორგანოებმა, სასულიერო პირების მხრიდან, ქვეყანაში ძალაუფლების ხელში ჩაგდების მცდელობა აღკვეთეს.