საქართველოში პროტესტის 201-ე დღეა – თბილისში, რუსთაველის გამზირზე მოქალაქეები შეიკრიბნენ, რომლებიც ამერიკის შეერთებული შტატების ჰელსინკის კომისიისთვის ხმის მიწვდენას გეგმავენ.
პროტესტის რეჟიმში გადასული ადამიანები ვიდეომიმართვის ჩაწერას და შემდეგ მასალის სენატში გაგზავნას აპირებენ. მათი მთავარი მოთხოვნაა, რომ სენატმა “ქართული ოცნების” სანქცირების დოკუმენტი, სახელწოდებით “მეგობარი აქტი” კანონად დროულად მიიღოს.
მთავარი სათქმელი არის ის, რომ ჩვენ დღეს გვაქვს ერთადერთი იმედი და ეს იმედი არის ამერიკა, ჯო უილსონი, რომელმაც დიდი ხნის წინ დაიწყო პროექტი “მეგობარი აქტი” და ტრამპის ეპოქაში ეს ხმა გააძლიერა, რომ საქართველო ამერიკის ნამდვილი მეგობარია. ჩვენ ვიცით, რომ საქართველო დღეს რუსეთის სპეცსამსახურების მიერ იმართება. ძალიან კარგად იციან ჩვენმა მეგობრებმაც. მიდის ვაჭრობა საქართველოსთან დაკავშირებითაც. ჩვენ უნდა ვანახოთ ამერიკას, რომ ჩვენ გვინდა ამერიკა ჩვენი მეგობარი იყოს და მალე მიიღონ მეგობარი აქტი კანონად.” – განაცხადა ია ფარულავამ.