აშშ-ს ფედერალური სასამართლოს მოსამართლემ ჰარვარდის უნივერსიტეტში საერთაშორისო სტუდენტებისთვის ვიზების შეჩერებაზე პრეზიდენტ ტრამპის ბრძანება დაბლოკა.
მოსამართლის თქმით, თუ ის ამ საქმეში ახლა არ ჩაერეოდა, უნივერსიტეტს გამოუსწორებელი ზიანი მიადგებოდა მანამდე, სანამ ორივე მხარის პოზიციის მოსმენის შესაძლებლობა იქნებოდა. მოსამართლემ ასევე განმარტა, რომ მისი ბრძანება ძალაში სასამართლოს მომდევნო გადაწყვეტილებამდე დარჩება.
შეგახსენებთ, რომ ჰარვარდის უნივერსიტეტში სწავლის მსურველი უცხოელი სტუდენტებისთვის ვიზების გაცემის შეზღუდვის გარდა, გასულ თვეში დონალდ ტრამპის ადმინისტრაციამ ჰარვარდის უნივერსიტეტს უცხოელი სტუდენტების მიღება აუკრძალა. უნივერსიტეტის საჩივრის შემდეგ, ფედერალურმა მოსამართლემ აღნიშნული გადაწყვეტილება დროებით დაბლოკა.