დროების ექსკლუზიური ინფორმაციით, ბაჩიაშვილი დაკავების შესახებ სუს-ის მიერ გავრცელებული ვერსია მთლიანად სიყალბეა. ინფორმაცია ამის შესახებ დროებას სანდო წყარომ გაანდო.
კერძოდ, გიორგი ბაჩიაშვილი არა 26 მაისს, არამედ შაბათს, 24 მაისს აბუდაბიში დააკავეს, შემდეგ დუბაიში წინასწარი დაკავების საკანში მოათავსეს და 27 მაისს, გამთენიას ქართული ავიაკომპანიის კუთვნილი ბორტით, პირდაპირი რეისით ჩამოიყვანეს თბილისის აეროპორტში.
ბორტზე მას საქართველოს უსაფრთხოების სამსახურის წარმომადგენლები დახვდნენ. სადახლოში, მწვანე სასაზღვრო ზოლში ბაჩიაშვილი ფიზიკურად არ ყოფილა.
წყარომ დროებას ასევე უთხრა, რომ დაკავების მომენტში ბაჩიაშვილის ე.წ მწვანე სასაზღვრო ზოლში ყოფნა შეუძლებელი იყო.
შეგახსენებთ, გუშინ დილით, სუს-მა გაავრცელა ინფორმაცია, რომ “თანაინვესტირების ფონდის” ყოფილი თავმჯდომარე, გიორგი ბაჩიაშვილი წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ დააკავეს.გიორგი ბაჩიაშვილის წინააღმდეგ საქმე ივანიშვილის განცხადების საფუძველზე 2023 წელს აღიძრა. პროკურატურა ბაჩიაშვილს 39 215 820 აშშ დოლარის კრიპტოვალუტის მითვისებას ედავებოდა. მას თბილისის საქალაქო სასამართლომ 2023 წლის 6 ივლისს აღკვეთის ღონისძიებად 2,5 მილიონი ლარის გირაო შეუფარდა.2025 წლის martSi, ბაჩიაშვილმა საქართველო მარტში დატოვა. პროკურატურამ ბაჩიაშვილი ძებნილად გამოაცხადა. 2025 წლის 10 მარტს თბილისის საქალაქო სასამართლომ გიორგი ბაჩიაშვილს, დაუსწრებლად „კრიპტოვალუტების საქმეზე“ 1-წლიანი პატიმრობა მიუსაჯა.გარდა “კრიპტოვალუტის საქმისა” გიორგი ბაჩიაშვილის წინააღმდეგ აღძრულია სისხლის სამართლის კიდევ ორი საქმე – საზღვრის უკანონოდ გადაკვეთისთვის და „თანაინვესტირების ფონდის” ხელმძღვანელობის პერიოდში „მტკვარი ჰესის” პროექტთან დაკავშირებით სამსახურებრივი მოვალეობის შეუსრულებლობა.