ბათუმში, 8 ოქტომბერს, 26 მაისის ქუჩაზე კორპუსის ჩამონგრევის დღეს ონლაინ გაკვეთილზე მყოფი, გარდაცვლილი მოსწავლის დათა შომახიას პედაგოგი, ირმა ვადაჭკორია ტრაგედიის დღეს ვახო ხუზმიაშვილის გადაცემაში “თავისუფალი სივრცე” იხსენებს:
“გაკვეთილი დაიწყო 11:00 საათზე. იმ დღეს შემოქმედებითი გაკვეთილი გვქონდა და ვარჩევდით კლასგარეშე ლიტერატურას და ისინი ინტერნეტში ეძებდნენ, წიგნების დასახელებებს ვეუბნებოდი, რაც უნდა წაეკითხათ. დათა ძალიან აქტიურად იყო ამ პროცესში ჩართული.
შემდეგ უკვე პრეზენტაციას ვაკეთებდი, შევარჩიე წიგნი – “ანა ფრანკის დღიური”, რომელიც სიმბოლურად იქცა. ვფიქრობ, დღეს მის ბედს იზიარებს დათა, რადგან მისი გარდაცვალების შემდეგ გახდა ცნობადი სახე.
11:18 წუთზე დათას ხმა არ ისმოდა, ამ დროს მიფიქსირებს “თიმსი” ბავშვის გასვლას. როგორც ჩანს, ეს ტრაგედია ზუსტად 11:18 წუთსა და 18 წამზე მოხდა.
არანაირი ხმაური არ გაგვიგია. კამერები ჩართული არ გვქონდა,”,- ამბობს პედაგოგი.
როგორც ირმა ვადაჭკორია იხსენებს, მისი მოსწავლე გამორჩეულად შემოქმედები ადამიანი იყო.
“არცერთი წიგნი ისე არ წაუკითხავს, მასზე გამოხმაურება რომ არ დაეწერა, არ დაეწერა რეცენზია, რომლის კოლექციაც მაქვს. თავისი ასაკის შესაფერისად აბსოლუტურად ყველა წიგნი წაკითხული აქვს, რაც კი მივეცი. ყველაფერს შემოქმედებითად უდგებოდა, ნახატები, გაფორმებები… უამრავი მასალა მაქვს, რომელიც მინდა, რომ საზოგადოებამ გაიცნოს.
ახლა კიდევ უფრო ვხედავ რაღაც სიმბოლურ კავშირს. ერთხელ ჩვენ წავიკითხეთ “თევზი ხეზე”, შემდეგ ბავშვებს ასეთი დავალება მივეცი, რომ სკოლაში მოეტანათ ისეთი რამ, რითიც საზოგადოებას წარუდგებოდნენ, თავის მეგობრებს ახალ ამპლუაში დაანახებდნენ თავს და მან (დათამ) საოცარი ნახატი მოიტანა, რეალურის და ირეალურის ანარეკლი, ორი სამყარო, მაგრამ ამას ახლა, ახლა ამ გადმოსახედიდან ვხედავ, მანამდე ასეთი რაღაცების შემჩნევა ცოტა რთულია,” – ამბობს პედაგოგი ირმა ვადაჭკორია ვახო ხუზმიაშვილთან ინტერვიუში.
ბათუმში, 26 მაისის ქუჩაზე კორპუსის ჩამონგრევის შედეგად გარდაცვლილ 9 ადამიანს შორის სამი არასრულწლოვანი, მათ შორის 12 წლის დათა შომახია იყო. ტრაგედიას ემსხვერპლა ასევე მოზარდის დედა მაია შომახია.