9 აპრილს, პარიზში, ჩემპიონთა ლიგის 1/4-ფინალური ეტაპის პირველ მატჩში, ერთმანეთს ქართველი ვარსკვლავის, ხვიჩა კვარაცხელიას „პსჟ“ და ბირმინგემის „ასტონ ვილა“ დაუპირისპირდნენ.
შეხვედრის 49-ე წუთში, როცა ანგარიში 1:1 იყო. ხვიჩამ ულამაზესი გოლი გაიტანა და პარიზელები დააწინაურა. კვარაცხელია „ასტონ ვილას“ წინააღმდეგ მატჩის საუკეთესოდ დასახელდა.
აღნიშნული თამაშის შემდეგ, ქართველ ვარსკვლავზე მისმა თანაგუნდელებმა ისაუბრეს.
„ეს წარმოუდგენელია, ის [კვარაცხელია] წარმოუდგენელ ფორმაშია, ისევე როგორც დეზირე [დუე], უსმანი [დემბელე] ან ნუნუ [მენდეში]. ეს ფაზა უნდა გამოვიყენოთ. ჩვენ დიდი გუნდი ვართ, მაგრამ არაფერი დასრულებულა, ბირმინგემშიც შესანიშნავ თამაშს ვაჩვენებთ და ნახევარფინალში გავალთ“, – თქვა ვიტინიამ.
„ვიცით, რომ ის [კვარაცხელია] არის ფეხბურთელი, რომელსაც ბევრი რამის მოტანა შეუძლია, იქნება ეს დაცვაში თუ შეტევაში. ის არის ფეხბურთელი, რომელიც ისევე მუშაობს, როგორც ნებისმიერი სხვა. ჩვენ გუნდი ვართ და მან დაცვასა და შეტევაში უნდა იმუშაოს და გოლები დღევანდელივით მოვა. ის კარგ ფორმაშია“, – აღნიშნა ნუნუ მენდეშმა.